Durante e ceremonia di instalacion di e directiva nobo di Aruba Lions Club a haci un donacion pa un total di 10 mil florin cu a keda reparti entre 8 organisacion cu ta traha aki na Aruba na bienestar di esnan cu necesidadnan.
Lions Clubs International ta dirigi su servicio y obranan di donacion segun nan 8 areanan di necesidad global cu e meta pa mehora bidanan y enfocando riba retonan di preocupacion mundial.
Organisacionnan cu a ricibi un donacion ta traha den e cuadra di e 8 areanan global di Lions Club Internacional. Ta pa e motibo aki a yama un representante di e siguiente organisacion pa bin dilanti pa ricibi nan donacion.
1. Pa Vision nos a yama e representante di FAVI.
Lions ta sostene e trabao relaciona cu cuido di salud visual y e mehoracion di calidad di bida di personanan cu ta visualmente incapacita of cu tin dificultad cu bista.
2. Pa Diabetes nos a yama e representante di Fundacion Diabetes Aruba. Lions ta apoya tur esfuerzo cu ta enfoca pa informa, conscientisa pa reduci e enfermedad di diabetes den comunidad y pa mehora e calidad di bida di esnan cu a ser diagnostica cu diabetes.
3. Pa Medio Ambiente a yama e representante di Aruba Conservation Foundation. Lions ta sostene actividadnan pa proteccion y restauracion di e medio ambiente, manera plantamento di mata, campaña di limpieza y programanan educacional di informacion y conscientisacion.
4. Pa combatimento di Cancer a yama e representante di Koningin Wilhelmina Fonds. Lions ta sostene e servicio brinda na persona y famianan afecta pa e malesa di cancer.
5. Pa esfuerzonan Humanitario a yama e representante di Fundacion pa Nos Comunidad. Lions ta responde na e necesidad di ayudo humanitario cu ta ser ofreci na nos población den necesidad.
6. Pa trabao pa Hubentud a yama un representante di YMCA.
Lions ta yuda y sostene e trabao cu ta yuda educa, guia, ofrece oportunidadnan, y desaroya liderazgo bao hobennan pa e siguiente generacion di lidernan comunitario.
7. Pa ayudo den caso di Disaster a yama un representante di Rode Kruis Aruba. Lions Club International Foundation (LCIF) ta yuda riba termino inmediato y largo durante crisis y disaster natural cu fondo y recursonan na momento cu esaki ta necesario.
8. Pa ayudo contra Hamber a haci un donacion na e Fundacion Cria nos Muchanan Pa e trabao y esfuerzonan desplega pa percura pa nos hoben studiantenan por ricibi diariamente un desayuno y pa Aruba Lions Club ta cu placer di por haci e donacion aki.
Erwin Oehler Lions’ Den – Engelandstraat 11 –
+297 582 1118 –
secretary@arubalionscub.org –
www.arubalionsclub.org
Aruba Lions Club ta un club di servicio cu pa casi 80 aña caba ta trahando pa e comunidad di Aruba y ta bao di auspicio di Lions Club Internacional cu ta consisti di mas cu 46 mil club den mas di 200 pais y ta conta cu mas di 1.4 miyon miembro rond mundo y a cumpli 109 aña di existencia cu ta hacie e organisacion di servicio mas bieuw y mas grandi mundialmente.
Por ultimo Aruba Lions Club ta compromete su mes pa sigui traha hunto cu su partnernan pa yuda mehora e calidad di bida di e pueblo pa medio di su diferente programa di servicio manera esun di Hospital Bed y Wheelchair, Smile Mobile, Feria di Salud, Back to School Foodbags. Ta pidi pa pueblo keda pendiente pa Aruba Lions Club su siguiente actividad.
