PALM BEACH, ARUBA – juni 2021 – Recientemente Aruba Marriott a organisa un ‘job awareness day’ pa tur asociado di Aruba Marriott, unda diferente departamento a setup nan booth den e Grand Ballroom di Aruba Marriott Resort pa asina comparti y intercambia informacion cu otro di con cada departamento ta funciona y alaves promove e posicion nan habri den cada area.
E evento aki a wordo organisa cu meta pa crea concientisacion di cada departamento rond di e complex di Aruba Marriott y asina promove crecemento interno y oportunidad nan pa desaroyo. Por medio di e evento aki, asociado nan a haya e oportunidad tambe pa por discubri passion y interes nan nobo den nan carera. Alaves, tur asociado cu a demostra interesa pa crece den un area specifico, a haya e oportunidad pa traha un plan di desaroyo hunto cu departamento di Human Resources, pa asina por yuda cada asociado yega na nan passion.
“E ta sumamemente importante pa nos asociado nan tin e oportunidad pa crece internamente y sigi desaroya durante nan carera na Aruba Marriott y ta pa e motibo aki nos ta organisa actividad nan manera e ‘job awareness day’ pa asina duna nan e instrumento nan necesario pa prepara nan mes pa e sigiente etapa den nan carera”, a comparti Ruthline Theysen, Complex Director di Human Resources.
Pa es nan cu ta desea di forma parti di e famia di Aruba Marriott, por bishita careers.marriott.com pa aplica pa e posicion nan disponibel.
Mas di Aruba Marriott:
Aruba Marriott Resort & Stellaris Casino a habri na aña 1995 cu 411 camber y despues a añadi 3 camber mas na aña 2018. Na aña 1999 a habri Ocean Club cu 311 camber y na aña 2004 a habri Surf Club cu 900 camber. En total, e famia di Aruba Marriott ta consisti di mas o menos 1200 empleado den servicio directo. E compleho di Aruba Marriott ta esun di mas grandi den henter Caribe, tanto den cantidad di camber como den cantidad di empleado.
