Na Februari 2013 mi articulo “E saga di renoba plachi di number tur aña” a mustra con costoso e cambiamento di plachi ta pa nos comnidad. Pa algun aña DIMP a stop e rekisito aki pero pa aña 2025 DIMP a dicidi di trece bek. Pa no perde tempo, dia 8 di Januari mi a paga 24florin pa e plachi y 300florin pa henter aña pa e number. Mi a compronde cu DIMP lo manda e plachi per post, pero esey tabata un fout. Mi mes mester bin buske. Como mi ta un invalido cu ta uza un rolator mi a kere cu ami lo por pasa padilanti di e rij. No, e rij ta solamente pa esnan cu mester paga. Pa haci cita, mester yama pa telefon.
Awe mi a purba haci un cita. Despues di warda mas di 30 minuut, si, mas di mei ora, na telefon y ningun hende a contestami mi ta puntra mi mes si DIMP sa kico e ta haci. Comunidad di Aruba mester perde masha hopi tempo pe e plachi nobo. Mi ta spera cu DIMP lo deshaci di e rekisito aki pa semper cuminsando cu aña 2026. Aruba merece miho.
