Diahuebs dia 12 di juni, e comunidad Filipino na Aruba a celebra e di 127 aniversario di Independencia di Filipinas cu un acto oficial yen di alegria, cultura y union. E celebracion a inicia cu un ceremonia di hisa bandera, un ofrenda di flor den honor di e heroenan nacional di Filipinas, y un serie di presentacion tradicional cu ta refleha e rikesa cultural di e pueblo Filipino.
Minister di Salubridad Publico drs. Mervin Wyatt-Ras, a asisti na e evento festivo aki y a duna un discurso elocuente di e comunidad Filipino su contribucion na desaroyo di Aruba. Presenta na e celebracion aki tabata Presidente di Parlamento, sr. Marlon Sneek, Embahador Honorario di Filipinas na Hulanda, sr. J. Eduardo Malaya, Consul-Honorario General di Filipinas na Aruba, sra. Amy Henriquez-Mendez, Vice Consul di Filipinas na Hulanda, sra. Crystal Dampil y demas invitado.
“Boso a duna un contribucion significativo y duradero na nos sociedad. Hopi di boso a haci Aruba boso di dos hogar, y a bira un parti integral di nos Pais”, Minister Wyatt-Ras a expresa. Minister Wyatt-Ras a subraya e rol extraordinario di Filipinonan cu ta traha den enfermeria y cuido medico aki na Aruba. “Nan compasion, habilidad y resiliencia ta wordo sinti profundamente cada dia den nos Hospital y facilidadnan di cuido. Nan trabao ta touch bida den e maneranan mas significante, pa cual mi ta profundamente gradicido”, Minister Wyatt-Ras a expresa.
Segun Minister Wyatt-Ras, e dia di Independencia ta simbolisa e libertad, lucha y determinacion pa un futuro miho. Ademas e mandatario a expresa su gran aprecio pa e balornan cu ta caracterisa e comunidad Filipino, esta respet, union familiar y un etica impresionante di trabao.
Gobierno di Aruba ta felicita tur Filipino cu e celebracion di nan Independencia, y ta expresa su deseo pa fortifica e lasonan di amistad y cooperacion entre Aruba y Filipinas, pa progreso comparti.
