Riba dia 10 di december Aruba ta uni cu resto di mundo den celebracion di Dia Internacional di Derechonan Humano, conmemorando e adopcion di e Declaracion Universal di Derechonan Humano di Nacionnan Uni na 1948. Cada aña ta enfoca riba un tema specifico y e aña aki esaki ta “Nos Derechonan Esencial Diario”, resaltando con derechonan humano ta un parti esencial di nos bida diario.
Especialmente den e periodo aki di turbulencia y incertidumbre, unda cu hopi ta experenciando un sentido creciente di inseguridad, malcontento y aislamento, e tema di Dia di Derechonan Humano ta destina pa reafirma y demostra cu ainda e balornan di derechonan humano ta keda un escogencia importante pa humanidad.
Derechonan Humano ta toca cada aspecto di nos bida diario, desde acceso na awa limpi, alimentacion, enseñansa y cuido di salud, te na libertad di discriminacion y e derecho pa por participa plenamente den sociedad.Na Aruba, e derechonan aki ta wordo protegi door di leynan local y tratadonan internacional, pa asina tur hende por biba cu dignidad y igualdad.
Tratadonan internacional importante di derechonan humano di Nacionnan Uni cu ta aplicabel na Aruba ta entre otro:
• Tratado Internacional di Derechonan Civil y Politico (1986)
• Tratado Internacional di Derechonan Economico, Social y Cultural (1986)
• Convencion riba Derechonan di Mucha (2001)
• Convencion riba Eliminacion di Tur Forma di Discriminacion Racial (1986)
• Convencion riba Eliminacion di Tur Forma di Discriminacion Contra Hende Muher (1991) • Convencion di Nacionnan Uni riba Derecho di Lama (2014)
Departamento di Relacionnan Exterior (DBB) ta haci un yamado na un y tur: gobierno, organisacionnan, scolnan y comunidad en general, pa para keto riba e importancia di derechonan humano den e bida cotidiano y pa traha hunto riba inclusion, igualdad y husticia social.
Riba 10 di december nos ta encurasha bo pa relfexiona y pensa riba bo mesun derechonan y con abo ta contribui na un sociedad mas husto. Ta participe y demostra cu Derechonan Humano ta nos dechonan esencial!
