Diamars ultimo a tuma luga un momento di reconocemento pa dos ekipo hoben: ekipo U-6, cu a titula campeon, y ekipo U-8, cu a titula sub-campeon den e prestigioso Little League Big Boys Tournament na Punta Cana, Republica Dominicana. Un logro cu ta mustra claramente cu “small players, big dreams” por bira realidad ora cu talento y disciplina ta hiba e liderato.
Minister di Relacionnan den Reino, Educacion, Hubentud, Innovacion y Deporte, mr. Gerlien Croes, a expresa su gran orguyo y emocion durante e ceremonia di reconocemento. Minister Gerlien Croes a elogia e deportistanan chikito pa nan balentia, entrega y pasion pa deporte, y tambe a mustra su aprecio profundo pa e coachnan y staff cu ta traha dia tras dia pa forma nos futuro atleta.
Minister Gerlien Croes a subraya: “Mi ta hopi orguyoso di nos muchanan. Nan ta demonstra cu determinacion, perseverancia, y un amor sin limite pa deporte, Aruba por briya internacionalmente un biaha mas. Mi ta gradici cada atleta, coach y staff pa pone nos bandera para den deporte na un manera digno y inspirativo.”
E participacion exitoso di Aruba den e torneo na Republica Dominicana ta reafirma e nivel di talento cu nos isla ta presenta den deporte di baseball, y e potencial cu deporte tin pa amplia horizonte pa nos muchanan.
Minister Gerlien Croes y Aruba ta felicita tur e muchanan di ekipo U-6 y U-8, nan famia, coachnan y tur esnan cu a contribui na e logro sobresaliente aki. E victoria y esfuerzo di e muchanan ta representa un motibo di orguyo pa nos pais.
Un biaha mas, Aruba a briya riba e base di dedicacion, disciplina y talento deportivo.
