Na Gabinete di Minister Plenipotenciario di Curaçao a tuma lugar un recepcion pa celebra Dia di Pais Corsow. Den nomber di Aruba, directora di Gabinete di Aruba Joselin Croes LL.M/M.Sc a asisti na e recepcion y a tene un discurso.
Den su discurso señora Croes a bisa cu Curaçao no ta celebra solamente un dia, pero e ta un celebracion di orguyo, identidad y solidaridad. ‘Curaçao no ta celebra unicamente nan Dia Nacional, pero tambe 15 aña di autonomia den Reino Hulandes. Riba 10-10-10, Curaçao y Sint-Maarten a haya nan Status Aparte, mescos cu Aruba casi 40 aña pasa. E status nobo a duna espacio pa crecemento y independencia. Y mira unda Curaçao ta para awe: un pais cu su mesun bos, un caracter unico y specialmente un pueblo cu a expande su cultura cu pasion y amor na tur parti di mundo. Curaçao a positiona su mes como un destinacion turistico unico, cu acento riba cultura, musica, gastronomia y herencia, ‘asina Joselin Croes a bisa.
Segun Joselin Croes desde 10-10-10 e isla a tuma pasonan grandi. Ela diseña su mesun rumbo cu un gobernacion fuerte, un economia creciendo y un cultura cu ta florece. Joselin: ‘Curaçao a laga di mira cu no unicamente e por construi su futuro, pero ta haci esaki cu orguyo, creatividad y perseverancia. Aruba tin comprencion pa e sentimiento aki. Aruba tambe sa ki ta nifica pa un isla chikito mester tuma pasonan grandi. Ora Aruba a haya su Status Aparte e tabata tin un economia cu hopi reto y Aruba no a haya “kwijtschelding” y mester a siña hopi liher para riba su mesun pia. Danki na perseverancia, creatividad y specialmente e forza di nos hendenan, Aruba a lanta cabes. Y mesun cos mi ta mira cerca Curaçao. Si ta trata e retonan di un pandemia o contratiempo economico, Curaçao ta laga mira: nos ta fuerte, nos ta sigui dilanti! Y laga nos ta honesto, Curaçao tin asina hopi cos pa ta orguyoso dje. Musica, baile, un cultura colorido y e calor di su hendenan y naturalmente su cushina.’
‘E aña aki mi tabata presenta na celebracion di Dia di Bandera di Curaçao aki na Hulanda y e tabata un fiesta cu bon ambiente, energia y orguyo – nos a sinti nos mes na Curaçao. Esey ta mustra cu aunke nos ta hopi leu, e amor pa nos isla, e cultura y idioma ta keda bibo cerca nos. Na e momento aki nos ta para como amigo, bisiña y ruman den Reino. Aruba y Curaçao no unicamente ta comparti un pasado, pero tambe un futuro unda cooperacion, respet y solidaridad ta para central,’ tabata e palabranan di Joselin Croes, directora di Gabinete di Minister Plenipotenciario di Aruba.
Finalmente Joselin a felicita den nomber di Gobierno di Aruba, Curaçao y tur Curasoleño cu nan Dia Nacional.
