Durante e di tres Conferencia Internacional di Ombudsman (the International Ombudsman Conference) cu a tuma lugar dia 26 te cu 29 di mei 2026 na Roma, institucionnan di Ombudsman, expertonan di derecho humano y representantenan di institucionnan publico for di diferente parti di mundo a reuni pa trata e manera cu sociedad ta enfrenta cambio rapido na nivel social, tecnologico y democratico.
Temanan principal di e conferencia tabata e impacto di digitalisacion y inteligencia artificial (AI) riba bida di ciudadanonan, proteccion di derechonan fundamental y garantia di servicio publico cu ta accesibel, transparante y enfoca riba e hende.
“E mundo ta cambia rapidamente, pero derechonan fundamental, dignidad humano y accesibilidad di servicio publico no por ta bou di presion. Pa e motibo aki, cooperacion internacional ta mas importante cu nunca,” segun Ombudsman di Aruba, mr. sra. Jurima Bryson.
Pa Aruba, participacion den e conferencia na Roma tabata un stap importante riba nivel internacional. E evento a ofrece oportunidad pa activamente posiciona Aruba den e red internacional di Ombudsman y pa construi lasonan estrecho cu institucionnan for di Europa, Africa, Asia, Norte, Centro y Sur America.
Ademas, relacionnan den region di Caribe y Latino America a wordo fortalece aun mas caminda cu a intensifica e cooperacion y a comparti conocemento y desaroyo institucional.
Durante e conferencia tambe a solicita atencion pa e rol cu hobennan tin den procesonan democratico, participacion social y proteccion di derechonan.
Un resultado importante di e conferencia ta e Declaracion di Roma 2026, den cual institucionnan mundial di Ombudsman ta reafirma nan compromiso na derechonan fundamental, independencia institucional y servicio publico cu ta pone hende central den un mundo cu ta digitalisa rapidamente. Ombudsman di Aruba tambe a firma e declaracion aki.
Participacion na e Conferencia Internacional di Ombudsman ta reenforsa e compromiso creciente di Aruba cu cooperacion internacional, bon gobernacion, y fortalecemento institucional.
Keda na altura di tur desaroyo
Bureau Ombudsman ta mantene comunidad informa via e siguiente canalnan di comunicacion:
- Website: www.ombudsman.aw
- Facebook: Ombudsman Aruba
- Instagram: ombudsmanaruba
- LinkedIn: Ombudsman Aruba
