Aruba ta sigui posiciona su mes como un di e paisnan lider den region den uzo di tecnologia moderno den aviacion y control fronteriso. E desaroyonan aki ta resultado di un cooperacion entre Gobierno di Aruba, Inmigracion Aruba y SITA, un empresa internacional specialisa den solucionnan tecnologico pa industria di aviacion y transporte aereo.
Durante un entrevista recien riba e media na SpaƱo CNN Negocio, George Miley, Vicepresidente di SITA pa America Latina y Caribe, a destaca e posicion di Aruba como un pais cu ta na vanguardia den implementacion di tecnologia moderno pa facilita proceso di biahe y fortalece control fronteriso.
Segun Miley, Aruba ta un ehempel importante den region, considerando e iniciativanan tecnologico cu e pais a implementa durante e ultimo aƱanan. E cooperacion cu SITA ta contribui na modernisacion di e procesonan na aeropuerto, cu enfoke riba eficiencia, siguridad y un miho experencia pa pasaheronan.
Inmigracion Aruba tin un rol importante den e desaroyonan aki, particularmente den implementacion di sistemanan moderno cu ta contribui na un control fronteriso mas eficiente y sigur.
Recien, SITA a organisa un forum na Aruba na cual varios pais a participa pa algun dia y na final a haya un presentacion di e facilidadnan moderno cu Aeropuerto Internacional Reina Beatrix tin den uzo pa haci e experencia di viajeronan mas eficiente, placentero y sigur.
Ademas algun tempo atras na Guatemala, SITA a reconoce Aruba cu e Reconnaissance High Security Printing Latin America Award.
Minister di Husticia, Integracion, Transporte Publico y Energia, mr. drs. Arthur Dowers, ta considera modernisacion tecnologico un aspecto importante den e esfuersonan pa fortalece e capacidad di autoridadnan encarga cu control fronteriso.
E cooperacion entre Aruba y SITA ta habri oportunidad pa sigui desaroya y implementa solucionnan tecnologico nobo. Ainda tin hopi mas desaroyonan den perspectiva, cu lo contribui na un sistema di control fronteriso mas moderno, eficiente y sigur.
