Aruba ta floreciendo, pero pueblo ta sufriendo. Esey ta e realidad duro cu parlamentario Eduard Pieters di fraccion di PPA a trece dilanti durante e rueda di prensa semanal: un pais cu ta bati record den turismo, pero cu no por maneha su propio desperdicio, ta un pais cu no ta avansa, sino ta un pais cu por colapsa.
Bario ta paga e prijs di un gobierno paralisa
Den Parkietenbos, Simon Antonio y Cas Paloma, e problema no ta teoria, ta bida diario. Holor stinki y toxico a bira parti di nan realidad, afectando salud, dignidad y calidad di bida. Durante e añanan, e hendenan aki a tende un sin fin di promesa, a mira yen di plan, a tende di un cantidad di investigacion y rapport, pero solucion nunca a yega. “Pueblo no ta pidi pa mas estudio. Pueblo ta pidi pa solucion,” Pieters a bisa. Pa Pieters, esaki no ta djis negligencia, ta un señal cu gobierno a keda paralisa, sin curashi pa tuma decision cu mester a tuma hopi aña pasa caba.
8 aña di politica, cero resultado
Pieters a recorda un momento clave den 2018, ora ex-minister Otmar Oduber a propone un incinerator como solucion. E tempo ey, a destrui e propuesta pa medio di drama politico, argumento ambiental y e interesnan cu awor, segun Pieters, ta mustra cu no tabata basa riba realidad sino algo mas personal. Awe, despues di casi un decada, Aruba tin incineratornan cu ta procesa desperdicio medico y sludge sin problema, mustrando cu e direccion ey tabata esun corecto. “Historia ta mustra, cu ora politica y interes personal domina, pueblo ta paga e prijs,” Pieters a declara.
Over tourism of under development?
E pregunta cu Pieters a lanta tambe ta simpel, pero devastador: Aruba tin over tourism of under development? Turismo ta crece, pero infrastructura ta keda atras. E cayanan ta deteriora, transporte publico ta faya y sistema di desperdicio ta den colapsa. Pa Pieters, esaki no ta coincidencia, sino un resultado di e añanan di falta di planificacion y vision. “Crecemento sin vision ta desaster cu lo explota,” el a adverti.
Gobierno no tin falta di informacion sino tin falta di curashi
Segun Pieters, problema no ta falta di estudio. Aruba tin suficiente rapport, suficiente investigacion y suficiente aviso tecnico pa actua. Loke falta ta boluntad y curashi politico.
“Nos no tin falta di plan. Nos tin falta di curashi,” el a bisa. Y mientras ta sigui pospone e decisionnan, e problema ta keda bira mas grandi, mas caro y mas peligroso pa salud publico.
Solucion ta cla, pero gobierno no ta move
Pieters a pone un cos concreto dilanti: Aruba mester bin cu ley riba awa y maneho fuerte, cu ta obliga e proyectonan grandi, manera e hotelnan y condominium, pa nan procesa nan propio awa sushi y reuza esaki di forma sostenibel. Esaki no ta teoria; esaki ta algo cu ya ta existi na Aruba caba. Cu un transicion gradual di 5 pa 10 aña ora di implementa e ley aki (overgangsregeling), esaki lo: baha presion riba sistema actual, reduci contaminacion y crea uzo inteligente di recurso, manera awa segun normanan ancra den e ley di awa aki. Pero pa esaki, gobierno mester move for di su discursonan pa tuma decision.
Un pais cu a perde rumbo
Pa Pieters, e problema aki ta mas grandi cu desperdicio. Ta un refleho di un pais cu a perde direccion. Aruba tabata sa cu turismo lo crece. Aruba tabata sa cu presion lo aumenta. Pero Aruba no a prepara su mes. “Un pais cu no planifica su crecemento, ta condena su pueblo pa sufri e consecuencia,” el a bisa. Basta di papia, ta tempo pa tuma liderazgo. Aruba no tin falta di estudio, no tin falta di recurso. Aruba tin falta di liderazgo. Y mientras gobierno ta sigui papia, e barionan ta sigui sufri. “Pueblo no por sigui biba den holor stinki y toxico, mientras gobierno ta discuti,” Pieters a conclui. “Si nos no tin curashi pa dicidi awe, mañan lo ta pio y e prijs final, ta pueblo mes lo pag’e.
