Despues cu awa di riool a sali for di sistema di rioolering un siman y mey pasa banda di hotelnan grandi, AWSS a manda un team pa haci investigacion di kico por tawata e causa. E personal di AWSS a haci inspecion na diferente sitio y a bin detecta cu e tapa di e sistema di rioolering tawata habri y a benta diferente materialnan den e sistema, a discubri paña, baranca, hero y asta un biga. Esaki a haci cu e fluho di awa di riool a wordo obstaculisa cu consecuencia cu el a bin ariba y a causa molester.
Tambe a bin descubri cu tapanan di pos cu normalmente ta cera a wordo habri banda di algun hotel. Tur esaki ta mustra cu lo por ta trata di un of mas persona cu mal intencion a planea y actua den coordinacion pa causa molester y haci daño na nos turismo y imagen di Aruba. Mientrastanto gerencia di AWSS a tuma e decision pa entrega keho na autoridadnan pa asina un investigacion penal por cuminsa pa haya sa kendenan ta tras di e actonan aki cu ta mustra di ta sabotahe. E asunto aki ta algo serio y gerencia di AWSS ta dunando esaki tur e atencion necesario.
