Cu e refineria di petroleo mas grandi di mundo den su epoca den nan bista, Prome Minister Mike Eman y Prome Minister Dick Schoof di Hulanda a anuncia awe e desicion historico pa termina definitivamente e epoca di refinacion di petroleo na Aruba.
Gobierno di Aruba lo desmantela completamente e ex-refineria Lago na San Nicolas y lo redestina e tereno pa desaroyo sostenibel y inclusivo.
“Casi un ciglo completo e refineria tabata e curason di e epoca industrial di Aruba,” segun Eman. “Generacionnan di Arubiano a construi nan bida rond e industria aki. Pero e futuro ta rekeri di curashi. Awe nos ta cera e capitulo di refineria, no solamente cu recuerdonan di loke e refineria a contribui, pero mas cu conviccion, pa habri un capitulo nobo di renovacion, sostenibilidad y bienestar comun.”
E refineria tambe tabata tin un papel crucial den historia mundial. Durante Segunda Guera Mundial, refineria Lago na Aruba tabata un di e proveedo principal di combustible pa e aliadonan, y asina a duna un gran contribucion na e liberacion di Europa y Hulanda. E significado historico aki ta haci cu e momento di transformacion ta algo berdaderamente special.
Gobierno di Aruba a solicita formalmente asistencia tecnicao di Gobierno Hulandes pa garantisa un desmantelacion y limpiesa di tereno cu siguridad, y tambe pa prepara e proceso di destaho internacional pa e re-desaroyo di e area.
Premier Schoof, cu a yega Aruba directamente for di COP30, a aplaudi e decision como un paso di balentia y visionario cu ta transforma pasado na futuro.
“Aruba ta demostra liderato transformando loke un biaha a alimenta e mundo cu energia, den un fuente di restauracion,” Schoof a bisa.
Gobierno Hulandes ta tratando e peticion di Aruba pa asistencia tecnico y lo contribui tambe cu 50 miyon Euro (100 miyon florin) di un fondo special pa transicion energetico, destina pa fortifica y modernisa e red di electricidad y e infrastructura di energia sostenibel.
E re-desaroyo di e tereno di Refineria di Aruba (RDA) ta habri perspectiva pa transforma San Nicolas den un centro pa energia limpi, innovacion maritimo, industria circular, vivienda, cultura y infrastructura berde, completamente alinea cu e vision di e bon comun y prosperidad sostenibel.
Pa guia e trayecto di varios aña aki cu exito, Gobierno di Aruba, cu sosten di Hulanda, lo kier establece un structura fuerte pa maneho, coordinacion y cu transparencia di tur e proceso di desmantelacion y re-desaroyo. E structura aki lo garantisa cu e proceso lo cumpli cu e standard internacional di mas halto di seguridad, proteccion ambiental y calidad institucional.
E decision, cu a ser ratifica pa Parlamento di Aruba a traves di e historico mocion-De Meza, ta marca mas cu un cambio economico, e ta un punto di buelta moral y ecologico.
Eman a enfatisa: “Cu respet pa e pasado, pero cu e bista pa e futuro, nos ta cera e capitulo aki y ta habri un nobo den cual e tereno di refineria ta bira un fuente di prosperidad nobo.”
Cu e paso aki, Aruba ta mustra mundo cu progreso berdadero no ta den keda pega den pasado, sino den e curashi pa rediseña e futuro, di extraccion pa regeneracion, di dependecia pa resiliencia.
Asina, poco despues di COP30, premier Eman y Schoof hunto ta tuma paso concreto pa pone e acuerdo climatico mundial den pratica.
