Prome Minister Mike Eman a reuni cu Michael Guevara Varela, presidente ehecutivo di PromPeru, y Rafael del Campo Quintana, vicepresidente di Asociacion di Exportadornan di Peru, ADEX. E encuentro a tuma luga durante un almuerzo di trabou ofreci pa embahador di Reino Hulandes, Alexander Kofman, na Lima. E combersacion a concentra riba oportunidadnan pa fortalece turismo, comercio y exportacion entre Aruba y Peru.
Michael Guevara a destaca cu intercambio turistico entre ambos pais a bin creciendo gradualmente. Segun e presidente ehecutivo di PromPeru, Aruba su reputacion como un destino sigur y e puntonan cu ambos pais tin en comun ta crea un bon base pa sigui desaroya e relacion. āAruba ta un pais sigur y tin hopi punto en comun cu Peru. For di PromPeru nos lo wak e sinergia cu tin, pa mas ciudadano di Aruba por bishita Peru y mas Peruano tambe por conoce e bunita pais di Caribe akiā, Guevara a declara.
E presidente di PromPeru a indica cu ambos destino tin un oferta turistico basa riba naturalesa y cultura. Mientras Aruba ta conoci pa su playanan, clima y siguridad, Peru tin diferente region geografico, sitio turistico y un herencia cultural amplio. Guevara a agrega cu Peru por studia e manera cu Aruba a fortalece seguridad pa su bishitantenan. Segun dje, esaki ta un area den cual tin espacio pa intercambio di experiencia y cooperacion. āNos mester wak con Aruba a fortalece su seguridad pa turista. Mi ta kere cu tin un trabou grandi cu nos por realisa for di Peruā, e presidente ehecutivo di PromPeru a bisa.
Caribe como mercado pa producto Peruano
Rafael del Campo a indica cu exportadornan peruano semper ta buscando oportunidad nobo y cu Caribe ta representa un mercado interesante cu ainda tin espacio pa crecemento. āCaribe ta un oportunidad adicional pa tur Peruano. Ta un mercado importante, cu un turismo impresionanteā, e vicepresidente di ADEX a declara. Segun Del Campo, e potencial no ta limita na e mercado local di Aruba. E diversidad di turista cu ta bishita e isla ta crea un oportunidad pa producto peruano wordo presenta na consumidor for di diferente pais den un solo destino. Del Campo ta mira potencial special pa exportacion di producto agricola. Prome cu avansa, sinembargo, ta importante pa studia composicion di mercado, demanda y preferencia di e diferente tipo di bishitante cu Aruba ta ricibi. āTa un mercado hopi diverso, pasobra tin turista for di diferente pais. Aruba ta un punto crucial pa studia con nos por yega na consumidor di diferente parti di mundo den un solo lugaā, Del Campo a bisa.
Un relacion cu potencial pa crece
E reunion a pone enfasis riba promocion mutuo di ambos destino, aumento di intercambio turistico y posibilidadnan pa amplia exportacion di producto peruano pa Aruba.
Aruba su conectividad aereo, siguridad y posicion den Caribe, combina cu Peru su oferta turistico, cultural y comercial, ta ofrece un base solido pa desaroya iniciativa nobo.
E encuentro cu PromPeru y ADEX a forma parti di e programa oficial di Prome Minister Eman durante su bishita na Peru. E dialogo a habri caminda pa un acercamento mas structura entre autoridadnan di turismo, sector comercial y e empresarionan di ambos pais.
