Minister di Vivienda, Infrastructura, Servicio Interno y Telecomunicacion, drs. Rene Herdé a ricibi e Director di Kadaster di St. Maarten, sr. Benjamin Ortega, durante un bishita oficial na Aruba. Durante e bishita aki, nan a firma un Carta di Intencion (Letter of Intent – LOI) entre Kadaster St. Maarten y DLV/Kadaster Aruba, cu e meta pa fortalece e colaboracion regional den maneho kadaastral y informacion geoespacial.
E acuerdo ta marca un paso importante pa stimula colaboracion mas estrecho entre institucionnan kadaastral den region di Caribe. Alabes e ta forma parti di un iniciativa mas amplio pa crea un Caribbean Cadastre Association (CCA), un plataforma regional cu lo enfoca riba intercambio di conocemento, desaroyo profesional y colaboracion entre entidadnan kadaastral.
Via e Carta di Intencion aki, Kadaster St. Maarten y DLV/Kadaster Aruba ta expresa nan deseo pa colabora den varios area, manera intercambio di conocemento tecnico y miho practica den registro di tereno y maneho di informacion geoespacial. Tambe lo tin enfoke riba entrenamento y desaroyo profesional pa personal kadaastral, dialogo tocante structura di gobernacion y marco legal pa institucionnan kadaastral, y exploracion di tecnologia innovador manera desaroyo di GIS y cartografia cu uzo di drone.
E acuerdo tin un caracter no-obligatorio, loke ta permiti institucionnan participante colabora riba un base boluntario mientras nan ta explora iniciativanan practico pa fortalece sistema kadaastral den region.
Durante e bishita tambe tawatin oportunidad pa papia riba posibel proyectonan pa futuro, manera mehoracion di servicio kadaastral, maneho di dato di infrastructura y fortalece colaboracion den e red di kadaster di Caribe.
Gobierno di Aruba ta mira e colaboracion aki como un paso importante pa modernisa administracion di tereno, fortalece capacidad tecnico y promove colaboracion regional di sosten pa desaroyo duradero.
