Pa medio di e comunicado aki, Arubaanse Voetbal Bond kier a informa lo siguiente. Pa eleva nos nivel di futbol y pa duna mas sosten na e cantidad di weganan programa pa e campeonato regular, AVB kier a anuncia cu lo bai cuminsa cu e Curso Basico pa Referee.
E modulo di e curso aki ta tuma lugar durante dos weekend den luna di maart 2022. E prome weekend di curso lo ta riba diabierna 4, diasabra 5 y diadomingo 6 di maart y e segundo weekend di e curso lo tuma lugar riba diabierna 11, diasabra 12 y e ultimo dia lo ta riba diadomingo 13 di maart. E curso ta tuma lugar na AVB TCAB na Shaba 24. E instructornan ta di AVB mes y e ta den e sistema nobo, innovativo y interactivo y lo ta mas riba tereno di wega.
Cuponan pa e curso aki ta limita na 15 persona. Cada persona interesa pa participa mester tin minimo 16 aña di edad y mester tin un bon condicion fisico. Tur material ta wordo duna door di AVB. AVB kier a haci un suplica pa tuma e oportunidad aki pa participa na e curso cual ta completamente gratis y asina nos logra haya mas referee. Ultimo dia pa inscribi pa e Curso Basico di Referee lo ta diamars 1 di maart. Si bo persona ta desea di participa na e curso aki, bo por manda un email na Monique.R@avbaruba.com of tambe por yama 5877357 y puntra pa e Head of Referee Sra. Monique Ras.
