Den Haag – Minister Plenipotenciario Guillfred Besaril a tene un reunion awe 25 di februari cu Glenn Arrindell pa bin cu un diseño nobo pa e website di Arubahuis. Director a.i. di Arubahuis mr. Glenn Ling a sigi e reunion aki virtual, mientras cu algun miembro di e personal di Arubahuis cu ta liga cu e website tambe a asisti na e reunion.
Minister Besaril den su splicacion a bisa cu e website nobo di Arubahuis mester refleha un organisacion cu ta dirigi riba duna servicio na e comunidad. E persona cu bishita e website mester por haya contesta riba su pregunta of riba su nesesidad. ‘E website nobo aki ta forma parti di e reorganisacion cu mester tuma lugar na Arubahuis. Nos mester tranforma Arubahuis di un organisacion administrativo na uno cu ta mas dirigi riba “costumer service”. Esaki ta e demandanan di e decada aki, unda e persona ta pidi informacion pafor di e orarionan di oficina. Pesey un “chatservice” lo bira un parti cardinal di e website,’ asina minister Besaril a bisa.
E trabaonan na construi un website nobo lo bai start awor y e calculacion ta cu den luna di mei e website nobo ta cla pa bai den aire.
