Algun siman pasa nos a bay haci un ceremonia Indigena. E prome tabata na un di e kraternan na Picaron, tereno eigendom cu a wordo destrui. Segun info fidedigno e doño ta un Arubiano cu tin lasonan hopi estrecho cu un trahado di DNM. Nos no por compronde con DNM por duna aprobacion na un proyecto di coba y destrui nos tera, saca santo sin tene na cuenta cu eynan tin un naturalesa endemico y ta cas di Shoco, Coneu, Warawara y mas . Pero mane nan di: “por la plata baila el mono.” Santa Cruz a keda keto y niun hende no a entama un caso contra e permisonan. Aruban Warriors su sede ta na Pos Chiquito pero desde 2021 nos tin nos headquarter na Picaron. Un poco p’ariba tambe ATCO ta cobando, haciendo un desastre cu nos naturalesa. San fuego ta sufriendo e mesun destino cruel. Y Sta. Cruz ta keto. Hopi bisiña a bin keha cerca AW pero ora bo puntra nan “y dicon boso no a haci nada?” nan no tin contesta of ta bisa cu no por haci nada toch contra e destruccion. Por a protesta por ehempel, por a entama un caso sumario LAR contra e permiso di e destructornan pero haci nada no ta un opcion.
AW ta di opinion cu nos Arubiano mester cera cabes y exigi un paro completo contra mas cobamento na full Aruba. Y claro cu mester stop mas permiso na stranhero paso cada hende cu drenta, ora gobierno fixnan, ta exigi tereno pa traha cas y asina nos mondinan ta somenta. Mester stop mas permiso y naturalisacion. Esaki mester bira un exigencia na Hulanda. Aruba no ta crece mas, esaki nos tin y nos mester cuid’e pa nos descendientenan. Na Dump tambe nos a haci otro ceremonia. E spirito malo di corupcion di gobiernonan cu ta ronda na dump ta haci cu e luga ta maldiciona. Tur locual politiconan a haci lo bin bek pa nan. P’esey nos di AW-Movimento Indigena Arubano lo exigi gobierno Hulandes un participacion(seat at the table) na tur proyecto cu lo bay afecta nos. Nos, e herederonan spiritual y historico di e pais aki, ta exigi consentimento previo y informa prome cu gobierno tuma decisionnan tocante nos tera sagrado cu lo afecta nos y nos descendientenan. Free, prior and informed consent.
