Diamars den ora di marduga, e Arubiano David Leung a huy di prison di Bani, asina instancianan oficial na Santo Domingo a informa. El’a huy hunto cu un otro preso mas. Dos otro cu tabata den e plan no a logra. Tambe durante e huida a cay un morto di un ex preso cu na Maart 2023 a recupera su libertad.
E departamento “Direccion General de Servicios Penitenciarioa y Correcionales DGPPS a cuminza un buskeda intensivo.
For di un comunicado di e institucion, nan a informa cu e presonan cu huy ta identifica como un cuidadano di Aruba: David Albertico Leung, alias David Martin Escudero y/o Albertico Franklin Leung, y Londry Cuevas Moreta y/o Londy Cuevas Moreta, di nacionalidad dominicana.
Tambe a start un investigacion riba loke a sosode cu a conduci na morto di un ex preso di 24 aña, cu a sali den libertad dia 24 di Maart 2023, yama Luis David Germán Lara,
E huida a cuminza ora cu e preso Londry Cuavas, condena na 20 aña di prison pa asesinato, a yama e oficial di turno di su seccion pa informa cu un otro preso a bira malo. E oficial cu tur confiansa a habri e cel, ora cu nan a gare na su pecho, tire den cel y cuminza nan trajecto di huida.
David Albertico Leung y/o David Martin Escudero y /o Albertico Franklin Leung tambe ta cumpli un condena di 20 aña di prisión pa violación di Ley 50-88, cu ta pa trafico di droga, haya culpabel di transporta mas di 800 paki.
Segun investigacion, e plan tabata pa 4 preso huy, pero 2 no a logra.
David Leung tambe tin un cuenta pendiente cu husticia na Aruba, ora cu na 2017, el’a logra huy, algun rato ptomer cu e lo mester a wordo deteni. Su caso a bay dilanti hues, sin cu e tabata presente y a ricibi 4 aña di prison, tambe pa asuntonan di droga.
