Astrid Vries, habitante di Mabon ta aprecia e forma cu Gabinete AVP-Futuro a pone bienestar di nos pueblo na prome luga door di implementa diferente paso cu ta fortifica e poder di compra di nos grandinan, famianan y e clase trahado. Señora Vries ta considera esaki como un inversion directo na bienestar di nos pueblo. Un punto cu a toca mi persona como habitante di Mabon ta e sosten brinda na nos grandinan. Den nos bario tin mas o menos 101 pensionado cu ta depende di nan pensioen pa cubri nan necesidadnan diario. P’esey Astrid ta hopi contento cu e aumento substancial di pension cu Gobierno di AVP-Futuro a implementa. E cambio aki ta representa un alivio real pa hopi di nos grandinan, permitiendo nan enfrenta e costo di bida cu mas trankilidad y dignidad. “Mi ta aprecia e paso concreto cu gobierno a tuma pa reconoce y balora e contribucion cu nos pensionadonan a haci durante henter nan bida laboral.” Vries kende ta presidente di Comision Mabon a remarca.
Pa famianan vulnerabel, e aumento di bijstand y e compensacion pa e muchanan cu ta bai scol (schoolkindertoeslag) ta representa un berdadero alivio. Como mama, tata of dunado di cuido, cada placa extra por hasi un diferencia grandi. E sosten pa articulonan di scol y schoolgeld ta mustra cu nos ta sigui inverti den enseñansa y den e futuro di nos muchanan. E aumento significante aki ta sosten pa famianan vulnerabel y ta confirma cu gobierno ta compronde e retonan cu hopi cas ta enfrenta pa cubri nan gastonan.“Mi ta aprecia e mehoracionnan den e posicion laboral di nos maestronan y e aumento di reparatietoeslag pa trahadornan di salario minimo. Nos mester sigui reconoce y premia e esfuersonan di personanan cu ta aporta na nos comunidad. E mehoracionnan aki ta mustra cu trahadonan cu ta sostene nos pais no a keda atras den e esfuerso pa fortifica poder di compra.” Vries a trece pa dilanti despues di a combersa cu habitantenan di Mabon despues cu Prome Minister Mike Eman a anuncia inversionnan den mehora Poder di Compra.
Den e area di salubridad, e decision pa reestablece cobertura di AZV pa remedinan importante y pa absorba e aumento di gastonan di combustibel ta mustra un gobierno cu ta pensa riba e impacto real di costo di bida. “Un di e aspectonan cu a toca mi curason mas ta cu Gabinete di AVP-Futuro no a lubida riba nos hendenan cu limitacion. Nan ta un grupo cu hopi biaha no ta haya e atencion cu nan merece, pero e aumento di nan beneficio ta un muestra cla cu tur ciudadano ta conta y cu ningun hende mester keda atras.” Vries a señala.
E resultadonan ta importante pa subraya: mas entrada pa nos grandinan y gruponan vulnerabel, mas sosten pa famianan cu yiu, mihor condicionnan laboral pa nos maestronan, menos carga financiero pa pensionadonan y mas siguridad economico pa miles di hogar riba nos isla.
“Mi ta kere cu nos mester mira e mehoracionnan aki no solamente como algo cu ta beneficia un grupo specifico, pero como algo cu ta afecta nos tur. Nos tur tin un mama, tata, ruman homber, ruman muhe of un ser stima cu ta pensionado. Tambe hopi di nos conoce un persona cu limitacion of un famia cu ta luchando pa lanta y manda nan yiunan scol. Ora un di e gruponan aki progresa, henter nos comunidad ta progresa. Y si Dios permiti, hopi di nos tambe lo yega na edad di pensioen un dia y lo beneficia di e mesun sosten y respet cu nos grandinan ta ricibi awe.” Astrid Vries di Mabon a comenta.
Vries ta contento di mira un gobierno cu no ta lubida su pueblo, specialmente esnan cu mas mester di sosten. Tin biaha nos mes como individuo tin un deseo pa yuda tur hende, pero no ta semper nos tin e posibilidad pa haci esey. Un gobierno si tin e responsabilidad pa hasi un diferencia den bida di miles di hende. Ora cu e Gobierno ta cumpli cu e responsabilidad aki cu amor, respet y un sentido di servicio, e Gobierno ta contribui na un sociedad mas fuerte, mas humano y mas uni.
