E torneo 60 plus organisa pa Aruba Juniors a conoce su finalistanan. Diadomingo cu a pasa Astros y e invictonan JT Tigers a enfrenta otro unda cu Astros ta sorprende JT Tigers ganando nan den forma convincente cu score di 9-0.


Den e di dos wega otro sorpresa a cay ora cu Boomerang Ildo’s Lottery gana e favoritonan Glovers cu score di 8 pa 1. Jose Maria “Kito” Croes tabata e MVP. E tabata e pitcher ganado y a bati di 2-2. Diabierna awo riba nos Dia Nacional 18-3-2022 ta e dia di e finalnan !


E prome wega lo start 9:30 am cu e revancha entra Aruba Juniors y Bambino. Den e prome ronda Bambino a gana Aruba Juniors. E di dos wega cu ta programa pa cuminsa 11or lo ta entre Glovers y JT Tigers. E wega aki lo dicidi e di 3 luga. Ambos team tin hungadonan conocí den softball di antes. E gran final di copa Himno y bandera lo cuminsa pa 12:30 y lo
ta entre Astros y Boomerang Ildo’s Lottery.

Ambos team a sorprende e dos favoritonan di e torneo. Astros ta conta cu hungadonan manera Raffy Daniels y Tony Warner entre otro mientras Boomerang tin den nan line-up Robby Alias y Tito Wever entre otro. Un wega cu lo ta yena cu tensión mirando cu ta después di dos aña, e veteranonan ta hunga un campeonato atrobe. Después ta sigui e wega entre Surprise cu e legendario Rock Angela y Jani’s Heavy Equipment. Bo ta cordialmente invita pa bin goza di bon wega di softball y apoya nos veteranonan 60 plus.


Pa 3or di atrdi lo tin un ceremonia unda lo duna homenahe na dos miembro di Aruba Juniors kendenan ta Urbano Kock y Erwin Croes. Musica lo ta den man di Amado Rosina Y Erick Rafael. Ambos tabata forma parti di e famoso grupo Dedhalavi Combo cu ta conocí pa un cantidad di éxito den añanan 80. Mas cu claro lo bay tin un bar y cushina bon surti. E famia di Aruba Juniors ta warda abo pa celebra manera ta tradición Aruba su Dia di Himno y Bandera

LEAVE A REPLY

Please enter your comment!
Please enter your name here