Editorial
“Subsidio na Aruba: Realidad versus percepcion politico”
Un lawaai cu meta pa confundi pueblo
Awor aki nos ta mirando un campaña di percepcion cu ta purba crea confusion den pueblo. A tuma e rapport di CAD y usa esaki pa pinta cu Endy Croes ta dunando subsidio sin control, cu implicacion di cosnan robes cu fondo. E realidad ta otro.
CAD no ta papia di falta di fondo, CAD ta papia di sistema deficiente
Ora bo lesa e rapport cu mente habri, CAD no ta bisa cu tin malversacion of uso di fondo pa meta personal. Nan ta critica un sistema cu ya pa hopi aña ta deficiente. Desde 2023 gobierno mes ta compci cu esaki y a cuminza cu proceso di cambio di ley di subsidio, un tema cu ta den landspakket. Pasobra e manera cu e procedimiento ta wordo aplica ta causa retraso y ineficiencia. E procedimiento no ta traha pa e realidad administrativo di Aruba.
Parlamento a autorisa tur subsidio
Otro punto importante ta cu ningun subsidio no ta wordo paga sin autorisacion di parlamento. Tur e sumanan ta wordo aproba den presupuesto anual. Gobierno despues ta implementa segun e proceso administrativo. Pero cu e procedimiento ta complica y no adapta na realidad, hopi organisacion ta keda warda riba landsbesluit, mientras nan ta sigui duna servicio cu pueblo ta depende riba dje.
42 organisacion ta haya subsidio bao un sistema cu no ta funcional
Tin 42 instancia na Aruba cu ta haya subsidio. Esaki no ta un favor personal, e ta un mecanismo pa sostene sector social y deportivo. Pero si e ley ta cla cu cada florin mester tin documento, y den practica e procedimiento ta imposibel pa cumpli rapido, e ora nos ta confronta un ley cu ta crea mas problema cu solucion.
Un critica politico strategico riba Endy ?
Esaki ta un critica politico strategico. Ta un movimento pa usa un rapport administrativo pa crea duda moral riba un ex minister cu a logra entrega resultado concreto, manera pista di atletismo na Santa Cruz. Mester wak esaki pa loke e ta: un lucha di percepcion den un ambiente politico cu ta busca cualkier oportunidad pa descredita oponente.
Ley di subsidio mester cambia pa proteha pueblo y transparencia
CAD ta cla cu e sistema mester cambia. Si nos kier transparencia, eficiencia y menos espacio pa tardansa den futuro, e ley di subsidio mester wordo actualisa rapido. Pero ta irresponsabel pa usa un analisis administrativo pa crea persepcion cu cosnan robes of falta di placa, cual no ta existi, solamente pa gana un punto politico.
Kico ta e resumen?
Realidad versus percepcion ta dos cos diferente. Pueblo ta merece claridad, no manipulacion. Gobierno tin su responsabilidad pa cambia e ley y e procedimiento. Politico tin su responsabilidad pa no mal usa e situacion pa ataca oponente, pa sacia e sed di odio. Aruba merece mihor cu esaki.
