Minister mr. Wendrick Cicilia ta sigui cu su biahe di trabou na Europa. Despues cu a culmina cu e reunionnan di International Labour Organisation (ILO) na Geneve, Suisa, e mandatario a continua pa Hulanda caminda ta atendiendo varios reunion na bienestar di pais Aruba.
Un di e prome reunionnan cu e mandatario a atende, ta cu e oficina di turismo di Aruba na Hulanda, ATA-Europa. Durante e encuentro e mandatario a inicia bisando cu e ta aprecia e labor cu cada un di e trahadonan ta eherce. E ta un labor importante mirando cu Europa no ta un mercado facil, pero e ekipo di ATA-Europa ta determina pa hunto cu Minister Cicilia atrae mas turista for di Europa pa nos isla.
E team a confirma e compromiso pa sigui traha duro pa produci resultado positivo pa nos isla. Nan no a keda sin menciona cu nan ta gradicido cu e presencia di Minister mr. Wendrick Cicilia. Ta prome bes den shete aña cu un minister di turismo ta bishita nan. Tin varios ‘young professionals’ cu ta traha pa ATA-Europa, entre nan algun cu tabata den klas hunto cu Minister Cicilia.
E turistanan procedente di Europa tin otro enfoke ora di bishita Aruba, ta prueba cu mayoria ta explora nos isla den su totalidad. Nan no ta keda den e zona di ‘high rise’ solamente. Minister Cicilia lo traha di cerca cu ATA-Europa pa sigura cu su vision di: prosperidad comparti bira un realidad, caminda e pueblo den su totalidad tambe lo sinti e efecto positivo di e fortuna di turismo.
E mandatario pronto lo anuncia su plan pa atrae mas aerolinea for di Europa, actualmente KLM y TUI ta hungando un rol importante di conecta Aruba cu Europa, pero ta importante pa sigui explora e posibilidadnan pa conecta Aruba cu mas destinacion, di un forma directo. “Sigui haci Boso best, Aruba ta orguyoso di Boso”, asina Minister Cicilia a termina bisando n’e ekipo di ATA-Europa.
