Artistanan representando Aruba, incluyendo Romelinda Maldonado, Nuris Lampe, y curador Elvis Lopez di Ateliers ’89 Punto Di Beyas Artes Aruba, a regresa dialuna ultimo masha contento. Nan a cosecha un exito grandi durante nan participacion na FUZE Art Fair 2025, cu a tuma luga den e compleho di hotel BAHAMAR na Nassau, Bahamas, for di 22 pa 26 di October 2025.
E team tabatin un solo dia, dialuna 21 di october, pa instala e obranan di arte cu tabata representa Aruba y Ateliers ’89. E exposicion tabata situa den e hardin exterior di e hotel, bou di un tent enorme. E compleho BAHAMAR mes ta un luga higantesco cu tres toren, yen di restaurant, shopping mall, y mas. Un detaye remarcabel ta cu tur participante a hospeda gratis, incluyendo pasashi y cuminda.
For di principio, e interes pa e booth di Aruba tabata impresionante. Segun e representantenan, e obranan di arte di Aruba tabata di calidad halto, diferente y avansa compara cu otro islanan Caribense. E presentacion di e booth tabata un exito inmenso.
Specificamente, e pinturanan di Nuris Lampe a cosecha admiracion sin igual, mientras cu e exculturanan di Romelinda Maldonado a genera hopi comentario positivo. Elvis Lopez, kende a instala e booth, tambe a expone su mesun obranan, incluyendo “Suerte-Chance”, cu a dun’e hopi satisfaccion.
E feria tabata bon organisa. Banda di e art fair, tabatin un culinary art fair tumando luga paden di e hotel, locual a atrae ainda mas bishitante. Un di e momentonan mas destaca tabata e bishita di e cantante mundialmente conoci Lenny Cravitsz na e art fair. Despues, el a duna un tremendo presentacion durante e fiesta di apertura den e jardinnan di BAHAMAR. E ambiente tabata unico y ameno, un momento perfecto pa topa cu artistanan nobo, curadornan y galeristanan.
Como resultado di e exito aki, Ateliers ’89 a ricibi un invitacion inmediato pa participa na e siguiente edicion di FUZE Art Fair.
Elvis Lopez ta extende un danki special na tur cu a yuda logra esaki. E ta menciona su ruman muher Odalis Lopez, cu a traha e trabounan di tela, y ta duna un “shout out” grandi pa Romelinda Maldonado y Nuris Lampe pa nan talento. Tambe e ta gradici Cine Aruba Adriano Nanof, Fundacion Ateliers ’89, Gobierno di Aruba, Cultuurfonds Caribe, Unoca, La Cabana, Setar, AHATA, H and H wine, y tur otro cu a sostene e programa anual di Ateliers ’89 cu ta crea e artistanan actual.
