Ateliers ’89 Punto di Beyas Arte Aruba ta habri inscripcion pa su siguiente workshop intensivo di fotografia pa luna di september 2026. E biaha aki, e reconocemento y formacion artistico lo ta bou guia di e conoci fotografo y artista Fernando Vermeer di Checkpoint Color, kende lo comparti su amplio conocemento y tecnicanan specialisa den saca potret durante oranan di anochi.
Fernando Vermeer tin un laso historico y artistico hopi fuerte cu Ateliers ’89, siendo un di e prome alumnonan di e institucion cu a bay sigui su estudionan superior na e afamado Gerrit Rietveld Academie na Amsterdam. Durante su carera profesional, el a representa Aruba na diferente ocasion cu su exposicionnan y obranan fotografico, pa despues bolbe su patria y tuma e maneho di e negoshi di su tata. E workshop aki ta brinda un plataforma di gran balor tanto pa hobennan artista cu kier desaroya conocemento profesional of academico, como tambe pa personanan cu kier siña of haci un “upgrade” di nan tecnicanan den fotografia.
E curso tin un duracion di un luna completo, iniciando dialuna 7 di september 2026. E lesnan lo tuma luga tres anochi pa siman—tur dialuna, diamars y diahuebs—di 6:30 PM pa 9:30 PM. Pa participa no ta rekeri experiencia previo, ya cu e guia lo adapta na nivel di cada participante, y e ta habri pa tur persona for di 14 aña en adelante. Como culminacion di e trayecto di formacion aki, tur participante lo expone e obranan cu nan a traha durante un exposicion special programa pa diahuebs 1 di oktober 2026 pa 8:00 PM, di cual e localidad lo wordo anuncia posteriormente.
Inscripcion ta habri desde awor y tin tempo pa registra prome cu dialuna 7 di september 2026. Personanan interesa por inscribi mandando un e-mail na elvis@ateliers89.org of yama pa informacion adicional na e cellular 5654613 of telefon 5885776 durante oranan regular di trabou. Directiva di Ateliers ’89 ta extende un invitacion na comunidad pa probecha e oportunidad unico aki pa amplia nan habilidadnan den arte fotografico.
