Artistanan Nuris Lampe y Suzanne van Spall lo presenta nan obranan contemporaneo durante e feria di arte Caribense di 21 te 25 di oktober 2026
Ateliers ’89 Punto Di Beyas Arte Aruba lo representa Aruba un biaha mas na FUZE Art Fair 2026, un feria internacional di arte Caribense cu lo tuma luga di 21 te 25 di oktober na Nassau, Bahamas. Pa di dos aña consecutivo, e organisacion Arubano a ricibi un invitacion pa participa na e evento cultural aki, cu ta reuni artista for di diferente pais den region.
FUZE Art Fair ta ofrece un plataforma importante pa artistanan Caribense presenta nan talento, comparti nan vision artistico y fortalece conexionnan cultural. E feria ta crea oportunidad pa arte contemporaneo di Caribe haya mas visibilidad, tanto den region como internacionalmente.
Pa e edicion di 2026, Ateliers ’89 a selecciona dos artista Arubano, Nuris Lampe y Suzanne van Spall, cu lo presenta nan obranan bou di e tema central Coming Home (Regresando Cas). E tema aki ta invita artistanan explora nan rais, identidad, memoria y e conexion profundo cu e luga di unda nan ta bin.
Nuris Lampe ta explora rais y memoria
Artista Nuris Lampe lo presenta seis obra riba canvas, inspira pa e simbolismo di rais y takinan bieu cu ta representa conexion cu pasado, sentimento di pertenencia y e buskeda di un luga familiar.
Den su trabounan, Lampe ta explora e relacion entre loke nos conoce y e incertidumbre cu futuro por trece. E idea di bolbe cas ta representa no solamente un regreso fisico, sino tambe e necesidad emocional di haya comodidad, siguridad y conexion cu nos origen.
Cu pinselnan chikito, e artista ta aplica su tecnica delicadamente riba canvas, creando profundidad, perspectiva y dimension. Cada obra ta invita publico reflexiona riba memoria, identidad y e importancia di nos rais den formacion di nos personalidad.
Suzanne van Spall ta destaca simbolismo di palo di Kwihi
Suzanne van Spall, na su turno, a haya inspiracion den un di e palonan caracteristico di naturalesa Arubano: e palo di Kwihi.
Pa e artista, Kwihi ta simbolisa e tera firme riba cual nos ta biba, pero tambe e conexion cu nos ancestronan y e historia cu ta forma parti di identidad di Aruba.
Van Spall lo presenta un instalacion artistico cu mascaradanan inspira pa bonchi di Kwihi. Cada bonchi a wordo traha individualmente, utilizando diferente material artificial.
Ademas, e instalacion lo inclui cuadranan chikito cu imagen di bonchi, realiza cu pintura acrylic y potlood. Door di e combinacion di diferente tecnica y material, e artista ta transforma un elemento natural familiar den un expresion contemporaneo di identidad cultural.
Apoyo importante pa participacion internacional
Ateliers ’89 Punto Di Beyas Arte Aruba a expresa su agradecimento na Het Cultuurfonds Caribisch Gebied (CCG) pa e apoyo financiero cu a haci participacion na FUZE Art Fair 2026 posibel.
Segun e organisacion, sin e contribucion aki, no lo tabata posibel pa Ateliers ’89 participa na e feria internacional.
Participacion na FUZE ta representa un oportunidad valioso pa promove arte Arubano, fortalece intercambio cultural y crea mas reconocimento pa artistanan local.
Pa Ateliers ’89, e invitacion pa di dos aña consecutivo ta un honor y un oportunidad pa mustra e diversidad, creatividad y calidad di arte contemporaneo cu ta wordo produci na Aruba.
Cu e obranan di Nuris Lampe y Suzanne van Spall, Aruba lo presenta un vision artistico cu ta conecta naturalesa, historia, memoria y identidad cultural den un escenario Caribense internacional.
