Y mas ainda e palabra di Dios ta sinja nos algo hopi fuerte den Proverbionan 17:13 bisando;
Esun cu paga bon cu malo, maldad lo no bay for di su cas nunca.
Mira pa ni un hende no paga otro malo cu malo. Pero semper busca loke ta bon pa otro y pa tur hende.( 1 Thesalonisensenan 5;15).
Nunca paga malo cu malo,na ningun hende, Respeta loke ta corecto den bista di tur hende,Si ta posibel asina leu cu ta depende di boso, sea na pas cu tur hende.( Romanonan 12:17).
No pagando malo cu malo y insulto cu insulto, ma mas bien dunando un bendicion,pasobra boso a wordo yama pa e proposito aki pa boso por hereda un bendicion.( 1 Pedro 3:9).
Tin hopi instigacion ta tumando lugar, caminda hende ta pinta otro malo den bista di otro, pa nan hanja beneficio, pero esey ta mentira di diabel, pasobra si bo ganja riba un hende, of papia malo di dje pa asina abo por crece, e cos ey lo no tin beneficio pa bo, pasobra Dios no ta obra den maldad.
Mamai y Papai mester tin mesun interes den educacion di nan yuinan, pa lanta mucha decente y cu respet.
No por ta asina cu e tata ta permiti bagamunderia pa asina hala e muchanan na su banda of e mama ta tolera falta di respet, pa asina e muchanan ta pega riba dje, e tipo di strategia ey no tin beneficio den dje , pero semper e ta caba na tristesa y hopi dolor.
Ora un homber cay den adulterio y faya cu su esposa, hopi biaha e enemigo ta influencia e muher pa mescos cu e homber a haci cune, e tambe bay haci cu e homber, esey ta un gran mentira, cu e muher ta bay rebaha su mes y carga un pica cu e no mester a hinca su curpa den dje.
Importante ta pa busca pa sa kico a pasa y di unda e fayo ta bini , pa no corre divorcia, y despues drenta cu un otro hende, y e mes fayo ta wordo comete atrobe.
Esun cu no ta stima no conoce Dios, pasobra Dios ta amor. ( 1 Juan 4:8).
Ken cu confesa cu Hesus ta e Yiu di Dios,Dios ta permanece den dje, y e den Dios.( 1 Juan 4:15).
Ta hopi manera maldad, y malicia ta purba infiltra den curason di hende, no laga nos wak riba nos hubentud so, hopi biaha hende grandi ta haci malo cu otro, y asina e muchanan ta mira y kere cu esey ta bon.
Tin biaha ora nos ripara con malo cu malo ta wordo haci cu otro den famia, nos curason ta bira tristo y bo ta yora, pa hasta hende cu bo no conece.
Por ehempel con hopi propiedad ta bay perdi, pasobra hende no kier comparti cu otro, con tin hende no tin un cas, pero na otro banda e cas di e mayornan ta bay perdi, pasobra e rumanan no kier pa cierto ruman por biba den e cas.
Con hende a biba malo cu su propio yuinan, y a trata nan malo, y nan a aparta for di dje, y awor cu e ta grandi, ni yiu, ni nieto, no kier saca un manda yuda, pasobra nan ta paga malo cu malo, enbes di pordona y bendiciona e adulto mayor.
No bisa: Lo mi paga maldad bek, spera riba Senjor e lo salbabo. ( Proverbionan 20:22).
No haci boso curason duro contra otro.No paga malo cu malo, busca e pas di Senjor.
Sinceramente, Pastor Marcel Balootje
