Aruba Trade & Industry Association (ATIA) tin hopi aña ta advoca pa un reforma fiscal. Den su carta di April 2020, ATIA a informa Gobierno di su posicion favorabel encuanto reforma pa un sistema di VAT (BTW). Pa implementa un reforma di BTW, diferente otro impuesto mester wordo reduci of completamente elimina, pero tambe mester subi e eficiencia di DIMP y pa un reforma ta completo tambe mester analisa y baha gastonan.
Conforme e agenda di ehecucion di e Landspakket, Gobierno di Aruba a determina su escogencia, riba 15 di November 2021, pa bai cu un sistema di BTW cu lo reemplasa e sistema actual di BBO. ATIA conhuntamente cu KvK y otro gremionan comercial a manda un carta pa Minister di Finansa y Cultura, Xiomara Maduro, indicando cu nos kier mas inclusion den e proceso di evaluacion y escogencia di e sistema di impuesto nobo.
Den un reunion cu Minister y Directora di Departamento di Impuesto (DIMP), tur e gremionan incluso ATIA a expresa nos desapunto con e trayecto di escogencia a bai y a urgi pa nos por tin mas participacion si den e trayecto di preparacion pa implementacion di e sistema nobo y asina por aporta cu sugerencia y recomendacionnan practico. Minister Maduro y Directora di DIMP a confirma cu e gremionan, y otro stakeholders, lo wordo inclui mas den e di dos fase di e desaroyo pa cu reforma di e ley fiscal.
Un sistema di BTW ta uno cu lo genera placa pa caha di gobierno si e wordo implementa na un manera corecto. BTW ta un impuesto indirecto cu mas simpel e ta, mas efectivo e lo ta. Minister a duna algun informacion en general na e gremionan presente, pero Gobierno mes lo informa pueblo den su debido tempo. E pregunta cardinal, kico e tarifa lo ta? Tin hopi speculacion ariba e tarifa den mercado, pero nos di ATIA lo comenta ariba e tarifa ora e wordo anuncia oficialmente.
ATIA semper a enfatisa na Minister cu un reforma no kiermen cu ta busca manera pa genera entrada pa caha di Gobierno, pero cu un reforma total ta inclui un reduccion di gasto tambe y pa asina yega na un posicion financiero stabiel y duradero. Den landspakket, den diferente di e puntonan, ta wordo indica cu gobierno mester baha gasto, incluyendo gastonan di salario. Gobierno su focus awor ta pa baha e gasto di e interes di tur e fianzanan cu gobierno tin, cu ATIA ta aplaudi, pero ATIA ta keda enfatisa cu mester baha e gasto di full e aparato Gubernamental. Mescos companianan a haci den temporada di pandemia pa cambia strategia y traha den un manera mas eficiente y efectivo.
ATIA lo keda monitoria activamente tur e reforma nan cu Gobierno lo implementa. ATIA ta keda boga pa haya mas inclusion den e trayectoria completo di e plan di ehecutacion di Landspakket, pa asina por colabora pa haci e proceso mas efectivo y implementa e reformanan den un manera corecto.
