Diaranson 20 di januari 2026 a circula riba rednan social cu Gobierno di Aruba ta bay anuncia cu nan lo haci dialuna dia 26 di januari un dia liber mirando cu dia di Betico e aña aki ta cay riba un diadomingo. E informacion aki a bin manera un shock pa comercio mirando e tempo corto cu ta laga pa comercio por plania y ahusta na un cambio asina.
ATIA ta reconoce e significancia cultural di Dia di Betico, pero tin cu bisa cu ta lastima cu gobierno ta anuncia un decision asina critico cu tin un efecto gigantesco riba maneho di operacion pa tur comerciante na Aruba, sin evalua e concequencianan pa comercio bon prome; anto den e caso aki 3 dia prome cu weekend. Pa cu un medida asina mester duna comercio tempo pa por prepara, cambia schedule y citanan cu ya caba tin programa cu cliente.
Mas cu tur, mester pone enfasis cu si den futuro ta desea di haci un cambio asina grandi, mester sigura cu e tin base legal. Cu esaki kier men cu e cambio ta cubri pa ley. E manera con a tuma e decision, ta mustra mas como sigur un bon intencion di e Minister encarga pa cu e pueblo en general, pero ta lubida e consequencia cu ta bin cu ne cual tambe financieramente no ta adecuado pa comercio y e pueblo mes como cliente.
Pa clausura, ATIA su posicion ta pa dialoga decision nan adelanta hunto cu e comerciante nan y stakeholders den sector priva pa evalua e efecto cu por tin den nos comunidad y dicidi si e ta na bienestar di pueblo y cu tur legalidad na cuenta. Den e forma aki, comercio por ahusta adecuadamente sin tin un caso manera awor cual a trece descordia entre comerciante y trahador.
