Recientemente, e atletanan di Estrella Taekwondo & Martial Arts Foundation, a conclui nan participacion na e exitoso “Taekwondo Training Camp Curaçao 2026”, cual a tuma luga for di diahuebs 24 di maart te cu dia 29 di maart. E tabata un siman intensivo caminda nos atletanan a demostra un disciplina ehemplar y a eleva nan nivel deportivo significativamente.
Durante e campamento aki, e atletanan a wordo exponi na metodonan di training di halto nivel, logrando adkiri tecnicanan nobo di combate y tacticanan avansa. E tabata un experiencia unico pa siña, directamente for di maestronan di nivel mundial, manera Jesús Tortosa Cabrera y Mónica Urrego. Ademas, nos atletanan tabatin e oportunidad valioso di comparti y train duro hunto cu atletanan internacional biniendo di Aruba, Curaçao, Colombia, Suriname, Trinidad & Tobago y Merca (USA).
Banda di e training, e participantenan a ricibi un actualizacion riba e reglanan nobo di Taekwondo, dicta pa e refree Olímpico, Sr. Guillermo Rodríguez. Esaki tabata fundamental pa keda actualiza cu e exigencianan internacional di e deporte.
Competencia di Clausura
E Training Camp a culmina den gran forma cu un competencia final, caminda tur nos atletanan a duna nan maximo esfuerso durante e combatenan. E tabata e momento perfecto pa pone tur e conocemento y tacticanan nobo den practica, demostrando e progreso y e talento cu nos team di Estrella Taekwondo Aruba ta posee.
Palabra di Gratitud
Estrella Taekwondo & Martial Arts Foundation kier a expresa un gradicimento special na:
- Master Gilson Lourens di Olympia Taekwondo Association Curaçao y tambe na Sr. Ellon Donker di Federashon di Taekwondo Curaçao, pa e invitacion y e tremendo hospitalidad.
- Tur nos sponsornan, cual cu nan gran ayudo a haci e soño di nos muchanan posibel.
- Tur e mayornan pa nan apoyo incondicional y na e atletanan pa nan dedicacion.
- E Directiva di Estrella Taekwondo & Martial Arts Foundation pa nan vision y esfuerso continuo.
Cu e experencianan y lasonan di amistad internacional aki, Estrella Taekwondo ta sigui comprometi pa desaroya e talento di nos atleta nan, preparando nan pa futuro competencianan local e internacional.
