DEPORTES – Diadomingo merdia weganan di La Liga Santander a continua cu varios wega, e campeonnan di aña pasa Atletico Madrid a mira accion contra di Elche.
Atletico Madrid den nan prome wega a sa di gana Celta Vigo 2-1 mientras cu Elche y Athletic Club Bilbao a keda empata 0-0.
Ekipo di Atletico Madrid den prome mitar a bay ariba na di 39 minuut, cu gol anota pa Angel Correa y cu asistencia di Rodrigo de Paul.
Prome mitar a bay den descanso cu score di 1-0 na fabor di Atletico Madrid.
Den di dos mitar, ambos ekipo a haya oportunidad pa anota gol, pero no a sa di probecha di e situacion y asina tambe e wega a termina cu score di 1-0 na fabor di Atletico Madrid cu ta logra su di dos victoria den campeonato di La Liga 2021 y awor tin 6 punto na prome lugar riba tabla di posicion.
Despues di e wega aki a sigui otro wega interesante unda cu Real Madrid a enfrenta ekipo di Levante, Real Madrid apenas na di 5 minuut di prome mitar ta bay ariba cu gol anota pa Gareth Bale cu asistencia di Karim Benzema.
Prome mitar a bay den descansco cu score di 1-0 na fabor di Real Madrid.
Den di dos mitar apenas 1 minuut Levante ta empata e wega cu gol di Roger, asistencia di Gonzalo Melero.
Levante a sigui hunga bon futbol y tabata na di 57 minuut ta bay ariba cu gol di Jose Campaña y cu asistencia di Jorge de Frutos.
Real Madrid a haci algun cambio pa wak si por yega na empata e wega aki y a trece Vinicius Jr. cu ta logra empata e wega na di 27 minuut, cu un tremendo pase di Casemiro.
Na di 79 minuut, Levante un biaha mas ta bay ariba cu gol anota pa Rober cu a haci e wega 3-2, pero Real Madrid no a entrega y na di 85 minuut un biaha mas tabata Vinicius Jr. ta empata e wega 3-3 cu un tremendo gol.
Asina tambe e wega a termina cu empate cu score di 3-3, Real Madrid por a logra bay cu e victoria pero no a probecha di oportunidadnan cu a presenta den ultimo minuutnan di wega, pero ambos ekipo a baha tereno satisfecho cu e empate.
