Oranjestad, Aruba – E sector di enseñansa ta enfrenta un situacion precupante. Solo di Pueblo ta categorise como “codigo cora” cu ta un situacion alarmante. Un documento cu a drenta Parlamento e siman aki ta mustra placa pa diferente scolnan a wordo corta, unda e fondonan ta bini for di un corte grandi den post di Salario di Docenten. Parlamantario Endy Croes a informa di esaki y ta lansa su vos pa cuestiona.
E scolnan menciona den documento cu lo wordo corta ta:
Duna un Man School – Afl. 500.000 Colegio Arubano – Afl. 500.000 Cayenaschool – Afl. 200.000 Maria College – Afl. 200.000 Otro scolnan manera Sint Franciscus College, Fatima College, Mon Plaisir College, entre otro – tur ku Afl. 100.000
No ta prome ves cu Gerlien Croes como hefe maximo di Enseñansa ta tuma e ruta di austeridad. Riba 28 di maart 2025, e minister ya a implementa un corte di 10% riba e post di Goederen & Diensten, cu a representa un total di Afl. 2.9 miyon. Awor, otro Afl. 3 miyon lo wordo kita, e biaha aki, direktamente for di e salario di e docentenan mes.
E panorama ta alarmante: Kiko ta e rason real pa e cortenan aki? ¿Unda ta e boluntad pa proteha enseñansa a keda ?
Minister Gerlien Croes, cu semper a defende enseñansa, debe un splicacion publico na pueblo, na docentnan y na sindicato. Con hende mester wak cu e mes ministerio cu mester inverti den futuro di e pais, ta sigui corta fondonan vital pa nos scolnan?
Yamada na SIMAR: Unda boso vos ta?
E silencio di sindicato SIMAR, cu ta representa e docentnan, ta precupante. Pueblo ta sperando claridad di e recortenan aki. SIMAR ta consiente di e recortenan aki ?
Enseñansa ta e base di nos comunidad. Si nos sigui laga recortenan pasa sin bisa nada, nos ta pone futuro di nos muchanan den peligro.
Aki e lista di scolnan:
Scolnan i e cantidad di placa (For di Salario di Docentnan)
1. Anglo School – Afl 100.000
2. Cayenaschool – Afl. 200.000
3. Mon Plaisir College – Afl. 100.000
4. Sint Franciscus College – Afl. 100.000
5. Maria Goretti Afl 100.000
6. Fatima College – Afl. 100.000
7. HeiligHart Afl 100.000
8. Santa Teresita Afl 100.000
9. Mon Plaisire School Afl 100.000
10. Colegio Laura Wernet Afl 100.000
11. Faith Revival Afl. 100.000
12. Duna un Man School – Afl. 500.000
13. La Salle college – Afl. 100.000
14. Maria College – Afl. 200.000
15. Colegio Arubano – Afl. 500.000
16. EPB Afl 500.000
Total Estima di Recorte: Afl. 3.000.000
