Miembronan di Aruba TImeshare Association, ATSA, a bini hunto p’un reunion general na La Cabana Beach Resort & Casino recientemente den presencia di representantenan di mayoria stakeholder di Vacation Ownership Resort na Aruba. E reunion a inicia c’un discurso di bon bini di parti presidente di ATSA, Sulaika Kelly, Playa Linda.
Invitadonan special entre otro pa loke tabata e reunion general aki di maart 2026 tabata PFTSA, Pension Fund Tourism Sector Aruba. Su director ehecutivo Natalia Lacle kende a join e fondo na 2020 como Pension Manager y bira director ehecutivo na 2024, a duna un presentacion completo cu tur update recien na tur stakeholder presente. Aki a presenta e cambionan proponi sugeri p’e fondo pa gobierno di Aruba. Den su rol di director ehecutivo, Lacle ta percura pa tin bon relacion entre tur 140 compania miembro y mas cu seis mil miembro activo. E ta esun cu tin bista over di 17,000 diferente maneho c’un inversion combina di 250 miyon florin. E fondo ta fuerte y stabil segun Lacle, kende a sigui na splica con esaki ta dedica na sirbi tur miembro cu ta spaar pa nan retiro, y na esnan cu ta disfruta di terminonan faborabel di hipoteca.
PFTSA a keda funda na 1992 como un iniciativa di Aruba Hotel & Tourism Association y sindicato FTA, mirando cu ambos a comparti e mesun vision den loke ta necesidad den crea un fondo di pension cu lo yuda empleadonan den industria di turismo pa haya un entrada adicional na momento di nan retiro, ariba di nan pension general di AOV.
N’e reunion aki, Lacle a sigui na splica tambe e pensionnan den general. A trece dilanti tambe e ahustacionnan proponi p’e pension nacional. A papia extensivamente tocante actividadnan y servicionan di e fondo como tambe e balor agrega na su miembronan manera un organisacion non-profit.
Mientras cu e cambionan ta chikito, segun Lacle, ta cosnan cu lo tuma tempo pasobra lo tin un proceso largo prome cu implementa e ahustacionnan cu lo mester bini n’e pension nacional. Adicionalmente n’e informacion aki, a keda aproba e puntonan di e reunion di februari 2026, hunto cu presentacionnan for di comision riba tur update recien incluyendo di e hotelnan.
Beach Policy y otro desaroyo
Tesorero, Jurgen van Schaijk a raporta cu TPF su actividadnan ta riba pausa te ora cu miembronan nobo keda apunta. Aruba Tourism Product Enhancement Fund ta envolvi cu hopi proyecto di embeyecemento actualmente, anto ta wardando ariba aprobacion di sugerencianan haci. Tur miembro a bay di acuerdo pa tin un beach policy ahusta cu reglanan cla, y tur esaki mester ta compila y haci publico mas pronto posibel. E lo tin cu keda adopta pa tur stakeholder, incluyendo DIP (Departamento di Infrastructura Publico y Planificacion), y tambe Cuerpo Policial di Aruba.
Esaki ta algo cu lo mester toca actividadnan di watersport tambe, y otro cosnan manera suntan lotion cu ta obtenibel rib’e isla, adresando e preocupacionnan di seguridad cu esakinan ta trece, hunto cu tanto otro asuntonan pendiente.
A recorda e miembronan pa loke t’e temporada venidero di tortuga di lama y nan compromiso pa mantene iluminacion controla, den cuadro cu proteccion di e bishitante anual aki di nos isla.
E fundacion di seguridad, Tourism Security Patrol Aruba lo ta expandiendo su actividadnan pa cubri mas area den zona turistico.
Progreso di AWSS ta positivo
Pa loke ta AWSS, Aruba Water Sustainable Solution, basta progreso positivo a bin ta tuma luga ultimo tempo y miembronan ta satisfecho cu e nivel di cooperacion cu e compania nobo, trahando riba maneho sostenibel den tres punto clave di nos isla: San Nicolas, Parkietenbos, y Bubali.
Tambe durante e dialogo den e parti di discusion habri n’e reunion, tur hotel a raporta tremendo mehoracion y upgrade den nan facilidadnan den tur forma, incluyendo den capacidad di WIFI internet, comunicacion digital, instalacion di panel solar, mehoracion den streaming den camber, instalacion di lift nobo, bentana y porta nobo, upgrade den areanan interior y exterior hunto cu un hardin syntripic agroforestry, cual tabata un bunita proyecto nobo introduci na La Quinta pa planta berdura fresco p’e restaurant y empleadonan. Esaki lo bay atrae un demografica mas hoben tambe den loke ta proyectonan di timeshare.
Tocante ATSA
ATSA tabata estableci na 1994 y actualmente ta conta cu miembresia activo di mayoria di
propiedadnan di vacation ownership na Aruba. E asociacion ta traha na nivel local hunto cu
entidadnan gubernamental. Na nivel regional, unda Aruba ta sigui ricibi reconocemento manera
un destino modelo pa vacation ownership, ATSA tin laso profesional y ta beneficia di
colaboracion continuo cu ARDA, American Resort Development Association.
Miembronan di Hunta Directivo di ATSA ta: Sulaika Kelly, President; Rina Geerman, Secretario;
Pedro Vargas, Miembro di Hunta; Jurgen van Schaijk, Tesorero; y Luigi Heredia, Miembro di
Hunta.
