Dialuna mainta Minister Xiomara Maduro a trece un splicacion riba e ponencia di CAFT, cu desde 2016 pa awe, gastonan di huur a subi.
E gastonan di huur aki a subi, pero no ta placa cu ta bay pa Tanchi, Papa cu Primo, pero pa MFA-gebouw cu a wordo construi bao di Mike Eman su gobierno, unda el’a corta sinta, pero nunca el’a paga, pasobra ta awor e gastonan a cuminza core, esta bao di e coalicion di MEP.
Den e discucion publico bo ta scucha cu CAFT ta pidi Gobierno di 2015 te cu awor, pa duna un vista riba gastonan di huur: Kico ta sali afor? mas di 60% di gastonan di huur di edificio, ta paga edifcionan PPP, manera edificio di Directie Financien, DOW y DIP, Centro di Husticia, Warda di Shaba. Tambe tin e gebouwnan di MFA cu a bini aserca desde 2016/2017. Kico ta PPP? E ta un sorto di huurkoop unda cu pa 20 o 25 aña ta paga un huur y despues e edificio ta bira di Gobierno.
MFA ta un gasto grandi di huur pa pais Aruba. Otro edificionan cu ta caro, ta edificio unda Archivo Nacional ta huur como tambe e edificio unda Aduana ta huur. Asina cu keda cla cu Bohama, lo muda e Aduana for di e edificio aki. Esaki tin prioridad y ta bezig pa keda cla cu e edificio nobo y propio di Aduana.
Papa, tanchi, mama, primo:
Ora cu esaki drenta debate publico, mesora kier tilda cu ta Papa, Tanchi etc. Esaki no ta berdad, Minister Xiomara Maduro a bisa. Na 2018 Gobierno a cuminza paga pa MFA Gebouw, y pesey e post di huur di edificio a subi.
Oportunismo politico:
Mas cu claro cu opositornan ta bira oportunista, pasobra mesora nan kier lansa atake riba Gobierno, bentando culpa riba Gobierno, pero sin sa cu ta nan mes ta causante cu e gastonan di huur di edificio a subi.
Mike a corta sinta di MFA, pero e no a bisa ningun hende cu bo tin cu paga pe. El’a bisa “Cu orguyo Senjor Presidente”, wel ata orguyo ey! El’a corta sinta y awe pueblo tin cu paga pa e gastonan aki, Xiomara Maduro a bisa!
SOLO DI PUEBLO ta sorprendi di atakenan infunda, creando instigacion y odio, pa despues bin sali na cla cu ta MFA gebouw ta loke a subi e gasto di huur. SOLO DI PUEBLO ta kere cu politiconan mester ta mucho mas cauteloso cu nan mentira, pasobra e no ta contribui na pais Aruba.
