Tin un desgaste despues di gabinete Wever-Croes II y esey ta comprendibel y no tur hende por a yuda. Esaki ta loke cu Prome Minister Evelyn Wever-Croes a indica durante e programa Interes di Pueblo na TOP FM 95.
Berdad si ta cu Aruba ta un pais pionero y ehemplar den e region y henter mundo, p’e forma con lihe a recupera. A penas dos aña dspues cu e pandemia a pasa, Aruba a para bek riba su pianan. No tr hende a wak esey como algo importante pa continua cu ne lamentablemente, pero e ta un realidad si cu ningun hende no por kita.
Papiando di e resultado di eleccion, tabatin hopi manipulacion atrobe, manera cu por mira semper di e partido oponente. E promesanan irealistico cu tabata sa cu nan no por cumpli cu ne y esey a realisa tambe.
Por mira cu e gobierno aki a anuncia cu a hisa e pensioen di biehes entrante prome di januari un biaha mas, e biaha aki cu 2.4%. Si wak bek durante varios aña, ora a drenta gobierno na 2017, e pensioen di biehes no a wordo ahusta p’e gobierno prome cu nan practicamente nunca.
Unabes cu a drenta na 2018 a aument’e prome biaha. Na 2019 tambe. Pa 2020 y 2021 no por a aument’e pasobra tabata den gara di pandemia y e fondo tabata hopi critico e tempo ey. Pero ya na 2022 a aument’e pa di tres biaha. 2023 pa di cuater biaha y na fin di 2024 a aumente.
Ademas e reparatietoeslag cu e pensionadonan ta haya tambe a aumenta na 2018, na 2023 y mita di 2024 a bolbe aument’e.
Si mira bon, eseynan hunto a aumente den 7 aña cu 400 florin. Y esey ta algo cu por a haci pasobra ta hacie cu pasonan responsabel, stap pa stap.
E partido oponente a priminti cu lo hisa e pensioen di biehes cu 700 florin den un solo shot y esey no por, ta kibra e fondo. Segun Wever-Croes, kende tambe ta lider di MEP, e fondo por wanta un aña, maximo 2 y despues ta bay bancarota y e ora no lo tin pensioen pa ningun pensionado y ni p’esunnan cu tin cu bay bira pensionado.
A purba di alerta pueblo di esaki, pero e alerta no a yega tur caminda. Por a mira den apenas 10 dia despues di eleccion, ya e lider di e partido opositor a indica cu ya e promesa aki no ta relevante p’e mas. E 700 florin ta kit’e fo’i mesa basta e forma un gobierno, pasobra aparentemente partido FUTURO no ta di acuerdo cu nan riba esaki.
FUTURO tambe ta mira e cifranan y ta mira cu e no ta realistico. Den e declaracion ey di Mike Eman, apenas 10 dia despues di eleccion, ora el a sali for di informador y djs pa core forma un gobierno, a bisa cu “Mi no ta wanta mi mes n’e promesa di 700 florin. Nos ta bay wak con nos ta bay hisa pensioen di biehes den futuro.” Probablemente manera e MEP a haci, stap pa stap.
Segun Evelyn Wever-Croes esaki ta un manipulacion grandi y tin un palabra p’e: Kiezersbedrog. Ora ta engaña e votado, pasobra a pidi e votado confiansa, pasobra ta bay hisa su pensioen y manera cu a haya e oportunidad, no por a haci esaki mas.
Wever-Croes a topa cu hopi hende desepciona, pasora cu varios di nan a pone nan confiansa of a duna e voto n’e partido,no cu nan ta AVP, pa haya e pensioen p’e aumento y awo mester a scucha cu no lo tin un aumento, entrante april di e aña aki.
P’esey ta importante ora haya e derecho di voto, mester pensa bon prome cu tuma un decision asina. MEP a hisa e pensioen di biehes y nan ta orguyoso p’esey.
Tabata añanan hopi dificil. Anjanan cu cierto momento durante pandemia a kere cu e fondonan di AZV y SVb a bay kibra. Si e primanan no tabata drenta, cu casi no tabatin trabao y comercio, e fondonan ta core peliger. Pero a rescata esakinan tambe cu awo t’asina leu cu a aument’e y e lo sigui aumenta, pero den pasonan responsabel. Esey lo por sigui pasobra e economia lo bay duna suficiente p’esey.
