Gobierno di Aruba, por medio di Minister di Finansa, Asunto Economico y Sector Primario, mr. Geoffrey Wever, ta expresa su orguyo y satisfaccion pa mira con Autentico Aruba Culinary Festival 2025 organisa door di ATA ta sigui crece y fortalece e posicion di Oranjestad como un centro culinario vibrante y innovativo den Caribe.
E festival, cu a tuma lugar for di 11 te 19 di october, ta un celebracion di e esencia di Aruba — un mezcla di sabor, cultura y creatividad cu ta uni tanto chefnan local como talento internacional. E evento ta completa e esfuerzo di Gobierno di Aruba pa revitalisa Oranjestad y duna un impulso structural na e economia local via turismo, gastronomia y colaboracion publico-priva.
Un plataforma pa innovacion y orgullo nacional
“Autentico Aruba Culinary Festival ta mas cu un evento di cuminda — e ta un movemento cu ta uni nos cultura y ta proyecta e creatividad di nos pueblo. E festival ta un demostracion claro di con nos inversion den revitalisacion di Oranjestad y colaboracion cu sector priva por crea un energia economico vibrante” segun Minister Wever.
E edicion di 2025 a eleva e experiencia culinario na un otro nivel cu introduccion di The Autentico Kitchen y The Autentico Bar, dos espacionan nobo unda chefnan y mixologistnan local y internacional a comparti nan maestria via clase practico di cushina y mixologia. E formato innovativo aki a duna tanto bishitante como residente un oportunidad unico pa siña, goza y conecta den un ambiente moderno y accesibel.
Oranjestad: e curason culinario di nos isla
E festival a tuma lugar den e area na Wilhelminastraat/Columbusstraat, un espacio urbano modern y habri cu ta simbolisa e renacer di Oranjestad. E evento a logra atrae un gran cantidad di bishitante local y turista, creando un atmosfera di comunidad y energia positivo den e centro di ciudad.
“E meta Gabinete AVP-FUTURO ta cla: pa fortifica Oranjestad como un capital culinario di Caribe. E festival ‘Autentico’ ta prueba bibo cu, un vision claro, planificacion y colaboracion, ta conduci cu nos por crea un centro urbano atractivo y prospero,” Minister Wever a agrega.
E evento ta parti di un vision mas amplio di Gobierno di Aruba pa implementa e proyecto di Revitalisacion di Oranjestad, cu ta sigui avansa den areanan manera Lagoen y Wilhelminastraat. E proyecto ta enfoca riba crea infrastructura moderno, acceso facil y ambiente atractivo pa negoshi y bishitantenan, pa asina sigui stimula e dinamica economico y cultural di e centro di ciudad.
Un Aruba cu ta goza, crece y uni
Cu cada edicion di Autentico Aruba Culinary Festival, Aruba ta sigui posiciona su mes como un destinacion culinario di nivel halto, unda creatividad, sabor y hospitalidad ta uni pa crea experencia inolvidabel.
“E festival ‘Autentico’ ta simbolisa un Aruba cu ta mira pa futuro, cu orguyo y determinacion. Ta un inspiracion pa nos comunidad y un recordatorio cu un ciudad bibo ta nace for di colaboracion y for di amor pa nos isla,” Minister Wever a conclui.
Minister Geoffrey Wever ta gradici Aruba Tourism Authority (ATA) pa sostene y duna contedido na e vision pa haci Oranjestad, e centro culinario di Caribe.
