Auto Rijschool Bennett ta wardando pa e ley: “Landsverordening Handhaving Bestuurlijkebescherming Consumenten” drenta na vigor, pa entrega un keho contra Korps Politie Aruba /Bureau Examen Rijbewijzen (“BER”).
E ley aki recien a wordo aproba den Parlamento y ta segun proceso den su ultimo fase pa e por wordo publica.
Ley Nobo di Proteccion di Consumidor na Aruba: Kico E Ta Nifica?
E Ley di Proteccion di Consumidor recien aproba na Aruba ta duna Aruba Fair Trade Authority (AFTA) mas poder pa proteha consumidornan. AFTA, cu antes tabata regula competencia husto, awo lo investiga y sanciona propaganda falso, manipulacion, productonan di mal calidad, y falta di garantia.
Consumidornan lo por entrega keho mas facil via un portal digital y AFTA por actua contra patronchinan sistematico di violacion di derecho. Comerciantenan cu no cumpli por confronta multanan grandi, te cu Afl. 100.000,- of 10% di nan omzet. E ley aki, cu lo drenta na vigor 1 di october 2025, ta un paso crucial pa salvaguardia derechonan di consumidor na Aruba.
STRANGULAMENTO DI E RIJSCHOOLNAN
Ultimo añanan Auto Rijschool Bennett y VRA a publica diferente articulo ariba e maneho cu “BER”/KPA ta hiba desde e periodo di Covid-19 cu basicamente ta strangulando e funcionamiento y existencia di e Rijschoolnan.
Den pasado VRA e tene diferente reunionnan cu KPA na unda diferente puntonan di atencion a wordo treci dilanti pero sin algun resultado of cambionan di parti di KPA. KPA a keda mantene e medidanan cu grandemente ta afecta un di e entrada principal di e Rijscholen.
Durante di e periodo di Covid e medidanan cu Aruba a tuma tabata core paralelo cu esnan di Hulanda. Sinembargo pa loke ta trata e medidanan pa pasa e examen di coremento. CBR di Hulanda ta obliga tur candidato cu kier pasa e examen di Coremento pa hasi esaki via un Rijschool y bo ta obliga pa tuma un cantidad minimo di rijles pa bo por bai pa pasa e Examen di coremento.
Na Aruba Si, BER a exigi cu e candidato MESTER pasa e examen di coremento den un di nan auto. KPA a bay asina leu cu nan a lease 2 auto, cu nan ta keda ofrece GRATIS na e candidatonan.
KPA a cuminsa y ainda ta ofreciendo tur candidato pa pasa e examen gratis cu nan auto mientras cu KPA tin cu paga basta placa pa Lease 2 auto sin cu KPA ta cobra un cen pa e servicio ey. E rijschoolnan cu tabata cobrando e candidato pa nan haci uzo di e auto di e Rijschool pa pasa examen a perde un entrada esencial. Comentario di KPA semper tabata y ta cu nan no ta stroba e rijschoolnan pa nan huur nan auto.
Ta cua alumno ta bay huur un auto pa pasa examen si e por haya un pa fia gratis for di Polis?
E efecto di tur esaki ta mas grandi cu KPA ta kere. Pasobra e alumnonan a stop di tuma suficiente rijles for di e rijschoolnan. Maneho di Rijschool Bennett nunca a cambia. Bo mester por core bon y sigur pa bo por huur un di su autonan pa pasa examen cu ne.E alumnonan a calcula cu pa e suma di Awg 90,-nan ta haya 2 chens pa pasa e examen di Teoria y 2 chens pa examen di coremento. Cu otro palabra e ta costa un candidato Awg 45,- pa dos chens pa e Rij-examen cu ta Awg 27.50 pa cada examen. Ariba djie nan tin e uzo di e auto gratis di Polis.
No tin un Rijschool na Aruba cu por competi cu e Prijs di Awg 27,50 pa un Praktijk examen di KPA compara cu e prijs di Awg. 70,- pa un Rijles di un Rijschool.
Un alumno a comenta cu e ta mas barata pa paga Awg 45,- pa dos chens di Rij-Examen cu e posibilidad cu e por slaag
Ora un candidato cu no sa stuur kibra un lease auto durante di e examen ta KPA (Pueblo) ta paga pa gastonan pa drecha e auto.
A para bira cu alumnonan ta bay examen sin cu nan kier tuma sikiera un les. Alumnonan cu a caba di slaag ta siña un amigo con pa stuur. Maneho di KPA ta cabando cu un sector importante cu semper a traha pa garantisa un trafico sigur na Aruba.
E tres Pilarnan pa un trafici sigur ta:
1. Education = Rijscholen
2. Engineering= DOW (Caminda)
3. Enforcement = Polis ( Control)
Ora cu destrui un di e pilarnan, full bo siguridad di trafico ta cay den otro. E ley nobo ta duna tur hende un caminda pa cana y haci denuncia contra concurencia falso, abuso di poder y formamento di cartel. Loke ta bay ta un berguensa grandi ta cu Gobierno a lanta e Instancia aki pa proteha su ciudadano y e prome denuncia lo ta netamente contra un di su departamentonan.
E tres pillarnan mester traha hunto na bienestar di nos comunidad pa tin un trafico sigur!
Mi ta spera cu KPA por refleha riba su maneho prome cu entrega DENUNCIA pa concurencia falso.
Skirbi pa Eddie Bennet
Autorijschool Bennett
