Diahuebs atardi, De Dam na Amsterdam a wordo cera despues cu un auto a explota y pega candela. Servicionan di emergencia a yega rapidamente pa purba controla e situacion peligroso aki.
Testigonan a conta cu a scucha un explosion fuerte prome cu e auto a cuminsa kima. Video di camara di siguridad a confirma e explosion aki, mustrando con e auto a explota memey di varios persona cu tabata pasando banda di dje. Milagrosamente, ningun di e peatonnan aki a resulta herida.
Bomberonan a yega lihe pa paga e candela cu tabata menasa di plama. E chauffeur di e auto, kende aparentemente t’e unico persona den e vehiculo na momento di e explosion, a sufri herida serio. Te ainda no tin informacion exacto di e gravedad di su heridanan.
Autoridad ta investigando e posibilidad cu e explosion aki tabata intencional. Ta sospecha cu e chauffeur mes lo a causa e explosion. Un ekipo specialisa den explosivo ta investigando si tabatin material inflamabel den e auto.
De Dam lo keda cera te ora cu e investigacion keda cla, p’asina por determina e causa exacto di e explosion y e responsabilidadnan di e incidente aki.
