Invitado special, un celebridad renombra Jancis Robinson a bishita Aruba. Invita pa medio di Arion Wine Company den honor di su 20 aniversario. Jancis ta un autor, orador y autoridad renombra mundialmente pa loke ta biña, e ta skirbi un columna semanal pa Financial Times na London, y ta complementa esaki cu publicacionnan diario riba su website.
Durante su bishita riba e isla, Jancis a topa cu e tercer klas di Universidad pa un sesion interactivo riba tema di sostenibilidad. E encuentro a tuma luga na Arion Wine Company su luga principal na Ponton.
Den su presentacion na studiantenan, Jancis a bay over na describi e mundo di biña y su carera manera autor, e inovacionnan emocionante cu a sigui rond mundo, variante di biña nobo, hopi di nan indigena y previamente ignora, a descrubri nan di nobo y trece nan bek na bida.
El a discuti e influencia di cambio di clima riba e plantacion di druif, y con paisnan ta beneficiando di clima mas calor, mientras otronan mester traha mas duro pa por sobresali e temperaturanan halto y cosecha prematuro di druif.
El a papia tambe riba vines bieu, biña natural, introduccion di twist caps, e uzo di cork bottle stoppers y boter di biña menos pisa. El a discuti e importancia di un tera saludabel como tambe metodonan biodinamico diseña pa brinda vines mas saludabel y productivo.
El a remarca tambe cu ta hopi esencial pa papia cu huespednan tocante nan gusto y expectacionnan, el a toca tambe riba tema di bleki di aluminium y pakete di carton, biña organico y necesidad pa reduci emision di carbon pa loke ta henter e industria.
E encuentro interactivo a conclui cu un Q&A, na unda a haya chens pa haci pregunta y tuma un oportunidad pa saca potret den grupo. E studiantenan tabata hopi encanta cu e conocemento amplio di Jancis riba e complexidad di produci biña.
