Diaranson anochi autoridad di Aruba a canta Bingo, ora cu nan a hit dos casino clandestino. Di acuerdo cu informacion cu SOLO DI PUEBLO a copila, ta mustra cu ta for di basta tempo caba autoridad ta loer actividadnan ilegal di casino riba nos isla. Tin mas di 5 casino ta opera ilegal, y varios di nan tin nomber tambe.
Diaranson a toca pa drenta dos edificio, uno situa na Wayaca, registra bao di nomber di Zega Corporation, (Elvio Livi), y otro situa na Dakota Shopping Paradise ( Lorenzo Arends). Na ambos sitio autoridad a haya setup completo di casino, incluyendo material, mesa, como tambe na ambos localidad a haya caha fuerte cu ta contene miles di florin y dollars.
Detencion di operador:
E operador di casino na Dakota Shopping Paradise a wordo sorprendi na sitio y a keda deteni.
Varios casino clandestino:
Aparte di Casino “Wayaca”, cu Casino “Dakota”, tin mas casino tambe, manera entre otro uno cu ta yama “Juana”. Ta un red di operadornan, cu sa con pa mercadea e clientenan potencial, cu ta gusta hunga den casino. Durante pandemia di Covid-19, e actividadnan na e casnan ilegal a continua normal y na varios ocacion sin tene cuenta cu ningun reglamento di distancia social etc. Tur esaki ta bay man den man cu prostitucion, unda ta bestel damanan atractivo cu ta dispuesto pa dal un trip.
Tin nombernan di diferente persona ta wordo menciona, y algun di nan tabata ex politico, y varios otro nomber cu ta wordo mira como “inversionista” di casino, pero nan mes no ta acudi na e casino.
Casinonan cu permiso:
Den circulo di varios casino cu ta opera cu permiso, tambe tabata tende e keho aki, ora cu e propaganda tabata core pa asina trek cliente hiba na casino clandestino. Casino cu ta opera legalmente a sufri masha hopi mes, a perde placa, a perde negoshi, na man di operadornan ilegal. Mientras casino legal mester cumpli cu tur sorto di control di Banco Central, etc. etc. e casinonan clandestino tabata raspa bay, sin paga nada di belasting.
Evadi control di Banco Central y belasting:
Mientras tur casino legal tabata cumpli cu belasting, control, cambio di moneda, e casinonan clandestino tabata gana placa bruto, sin mester cumpli cu nada. Esaki tabata un oportunidad tambe pa tur sorti di labamento di placa por tabata tuma lugar. Claro cu esaki ta placa cash, cu nunca por wordo hiba banco, pasobra simplemente lo no wordo accepta sin mas.
Doño di edificio ta bisa di ta inocente:
Fuentenan na altura ta bisa cu doñonan di edificio ta pretende cu nan ta inocente y cu nan no tabata sa cu tin casino den nan localidad. Parce cu nan kier copera cu husticia pa asina conta tur loke nan sa. Lo ta berdad cu nan no sa kico tabata pasa den nan edificio? Kisas nan a bisti e “bril ciego”?
Finalmente Autoridad a cuminza activa pa asina pone ordo den nos pais. Maske nos mester bisa cu ta hopi laat, pero beter laat dan nooit.
