Arubaanse Voetbal Bond (AVB) ta comunica formalmente na tur partido involucra den e Division Honor Liga Plata tocante e cambionan den organisacion, acceso y circulacion di trafico pa e tres partidonan programa pa diadomingo, 29 di maart 2026. E ahustacionnan aki ta necesario debi na e celebracion di Fiesta Rotaria cu lo tuma luga riba e parkeerplaats di Centro Deportivo Guillermo Prospero Trinidad (C.D.G.T.).
Pa garantisa cu e weganan ta transcuri sin contratiempo, a stipula e siguiente directivanan:
1. Acceso pa Personal y Oficialnan
Tur lider, entrenador, personal di cuerpo medico, Match Commissioners y arbitronan mester usa e entrada principal banda di Entertainment Center (Nagico). E porta aki lo fungi como e unico punto di entrada y salida pa e personanan menciona durante henter e jornada di diadomingo.
2. Distribucion di Acceso pa Fanaticonan
Cu e meta pa mantene un flujo ordena y sigur di publico, AVB a dicidi riba e siguiente division di entrada:
- Fanaticonan di “Home-Team”: Lo mester drenta na e banda pariba (asuid), net caminda e ambulance ta staciona habitualmente durante weganan internacional. Aki lo tin e proceso di benta di ticket y e cashier. Ta pidi e ekipo local (Home-Team) pa facilita un (1) mesa y stoel pa e personal encarga.
- Fanaticonan di “Visitor-Team”: Lo mester usa e entrada regular banda di Entertainment Center pa drenta e facilidad.
3. Procedimento di Salida
Unabes cu cada partido finalisa, ta haci un yamada na tur presente pa bandona e facilidad na un manera ordena. Cada persona mester sali via e mesun porta caminda el a drenta.
AVB ta gradici tur club, oficial y fanaticada pa nan cooperacion y comprension pa cu e ahustacionnan temporal aki, pa asina e deporte rey por continua sin interupcion banda di e actividadnan di comunidad.
