Clubnan di Division Damas, Division Uno y Division Honor a wordo invita pa presenta nan uniformnan oficial durante e actividad
Aruba Voetbal Bond (AVB) a invita tur club miembro di Division Damas, Division Uno y Division Honor pa participa na e loting oficial den preparacion pa Campeonato di Futbol 2026-2027. E actividad tabata programa pa diaranson 14 di october 2026, pa 6:00 di atardi, na Eagle Bowling Sasaki.
Den un carta oficial fecha 8 di october 2026, AVB a informa e clubnan tocante e preparacionnan pa e temporada nobo, cu ta inclui no solamente e loting, sino tambe registracion di uniformnan cu cada club lo uza durante e campeonato.
Registracion di uniformnan pa temporada nobo
Un di e puntonan importante den e preparacion ta e intencion di AVB pa mehora e structura logistico relaciona cu asignacion di uniform pa cada partido.
Pa logra esaki, e federacion a solicita tur club participante pa presenta nan uniformnan oficial di Home y Away, incluyendo esunnan di nan keeper.
Cada club mester presenta e shirt, short y mea di su uniform di Home y Away, como tambe e combinacionnan correspondiente pa keeper durante partidonan na cas y pafor.
Segun AVB, e registracion aki ta esencial pa facilita e trabou di Match Coordinatornan, kende ta responsabel pa registra e informacion tocante e colonan di uniform di cada club.
Cu e informacion aki disponibel, AVB ta busca mehora coordinacion prome cu cada encuentro, specialmente den situacionnan unda e uniformnan di dos ekipo por tin colonan similar.
Mas promocion pa clubnan di futbol
Ademas di e aspecto logistico, AVB ta desea uza e oportunidad aki pa presenta y promove e uniformnan di su clubnan miembro den medionan social y prensa di Aruba.
E iniciativa ta forma parti di e esfuerso pa duna mas visibilidad na e ekiponan participante y crea mas interes rond di e temporada 2026-2027.
AVB a enfatisa importancia di cu tur club acudi na e loting cu e uniformnan solicita, pa asina por inicia e campaña di promocion.
E Match Coordinatornan presente durante e actividad lo registra e informacion di cada uniform, incluyendo e colonan cu e clubnan lo uza durante e campeonato.
Cu e loting y registracion di uniformnan, AVB ta pone enfasis riba un preparacion organisa pa e tres divisionnan, mientras e clubnan ta prepara pa un temporada nobo di competencia den futbol Arubano.
