Recientemente, Avi Tromp a firma cu University of Northern Colorado, di cual el a obtene un scholarship pa sigui su carera atletico y academico. Avi, un atleta di curason y hopi dedica, a cuminsa landa cu Giants Aquatics desde 2023, ora el a haci transicion di landamento artistico pa landamento competitivo. Den apenas dos aña, e atleta aki a pone mas cu 12 record nacional riba su nomber y a sobresali na diferente competencia internacional, regresando Aruba cu medaya y trofeo.
E bunita logro aki ta parti di e vision di Giants Aquatics y Avi ta un ehempel di con deporte ta habri caminda pa cosnan grandi, si traha cu vision, dedicacion, perseverancia y den ekipo.
E gran famia di Giants Aquatics ta sumamente orguyoso di Avi y ta desea Avi tur cos bon den e siguiente paso di su carera. Stand Tall!
