Durante e 2024 Pan Am Aquatics Age Group Championship, cu a tuma luga na San Juan, Puerto Rico, Giants Aquatics a participa cu 16 landado. Di e landadonan aki, dos a conkista titulo maximo.
Ta trata di Avi Tromp, cu a resulta di ta e high point trophy winner den su categoria di dama 19+. No solamente el a logra e titulo aki, sino tambe el a kibra e record di Aruba, haciendo 50m butterfly den 28.24 seconde. E record tabata pertenece na Keeley Maduro desde aña 2017. Desde siman pasa, Avi tin e record aki riba su nomber.
E di dos high point trophy winner ta Inald Fernandes Perna, cu a gana den su categoria di cabayero 15-18 aña. Acerca, Inald a landa su 50 freestyle den 24.07 seconde, pa cual el a gana medaya di oro. Asina Inald ta ocupa e di 4 puesto general na Aruba di 50m freestyle y di dos den su categroia actual (15-17aña).
Ademas, mester destaca cu Luis Mario “Cosho”Arends a logra acumula suficiente punto pa puesto number dos den su categoria, den cual e ta esun mas jong ainda. Di manera aki, el a manda un mensahe cla y raspa pa su contrincantenan, cu aki dos aña mester tene cuenta serio cu ne na e campeonato aki.
Giants Aquatics ta orguyoso di tur su landadonan cu a participa y ta sigui traha pa mas bunita logro den futuro pa tur su landadonan.
