NEW YORK / MONTREAL – Un accidente a sosode na e aeropuerto di LaGuardia na New York, ora cu un vuelo di Air Canada Express, biniendo for di Montreal, a dal den un truck di brandweer riba pista. Informacionnan ta confirma cu e dos pilotonan di e avion a perde nan bida den e impacto fuerte aki, pero tambe tin mas morto.
Detaye di e Sucedido
E incidente a tuma lugar banda di 11:40 di anochi (ora local), ora cu e vuelo AC8646, un CRJ-900 opera pa Jazz Aviation, tabata den proceso di aterisahe riba Runway 4. Pa motibonan cu ainda ta bou investigacion, e avion a bay dal frontalmente contra un truck di brandweer (ARFF) di Port Authority cu tabata riba e pista pa atende un otro emergencia menor.
Testigonan y potretnan for di e escena ta mustra e parti dilanti di e avion, e asina yama “cockpit” a keda completamente destrui. E impacto tabata asina fuerte cu e avion a keda cu su nanishi na halto y e truck di brandweer a keda benta di banda.
Victimanan y Heridonan
Autoridadnan na New York, encabeza pa Kathryn Garcia di Port Authority, a confirma cu:
2 Piloto: Lamentablemente a fayece na e sitio mes.
Pasajeronan: Tabatin un total di 72 pasajero y 4 miembro di tripulacion abordo.
Hospitalizacion: 41 persona a wordo transporta pa hospitalnan den cercania di Queens. Mayoria a wordo duna de alta caba, pero 9 persona ta keda interna den condicion serio.
Bomberonan: Dos oficial di Port Authority cu tabata den e truck tambe a resulta herida, pero nan bida no ta core peliger.
Aeropuerto Cera y Investigacion
Debi na e gravedad di e accidente, aeropuerto di LaGuardia a keda cera mesora, causando cancelacion di cientos di vuelo, incluyendo conexionnan cu Canada y otro partinan di Merca. E team di NTSB (National Transportation Safety Board) ya ta na e sitio pa cuminsa cu e investigacion tecnico pa determina pakico e truck tabata riba e pista na e momento preciso cu e avion tabata baha.
Air Canada a publica un comunicado expresando nan profundo dolor pa e perdida di nan coleganan y a habri un linea di asistencia pa e famianan di e pasaheronan involucra.
