Den un desaroyo politico sorprendente, Partido AVP, mediante parlamentarjo John Hart, ta e mesun awor cu ta pone presion pa cuestiona e programa di FASE (un medida di emergencia cu a yuda mas cu 12 mil ciudadano durante e crisis di COVID-19) unda cu nan propio declaracionnan, nan ta bisa hopi mas di kiko nan kier.
Parlamentario di AVP, John Hart, a sali publicamente cu acusacionnan serio despues di analiza e rapport di Algemene Rekenkamer (ARA) riba Jaarrekening 2020. Segun Hart, casi 43 miyon florin a wordo paga den marco di FASE sin un base legal formal na e momento, algo cu el a califica como un violacion grave di regulacionnan financiero.
Pero e pregunta grandi cu hopi hende den pueblo ta haci awor ta: kiko AVP kier realmente cu esaki?
Pueblo mester paga bek ?
Si sigui e logica di AVP, e conclusion lo por ta peligroso: si e pagonan tabata “ilegal”, esey lo kier bisa cu e miles di hende cu a depende di FASE pa sobrebibi durante pandemia, mester paga e placa bek?
Durante COVID-19, hopi Arubiano a perde nan trabou di un dia pa otro. Gobierno di e tempo ey a tuma un decision rapido pa evita hamber y pobresa, aunke no tabatin un ley formal mesora. Esaki mes ta confirma pa ARA desde 2022, cu despues Parlamento a atende e situacion cu un ley pa formalisa e pagonan.
Pero awor, despues di 4 aña, AVP ta bin cu e mesun informacion comosifuera ta algo nobo.
Iregularidad of realidad di emergencia?
Algemene Rekenkamer Aruba a señala ciertonan falta di procedura y of control, manera algun pago dobbel of falta di documentacion formal, pero esaki no nifica automaticamente fraude of abuso di e ciudadano comun.
Mes John Hart a reconoce cu e situacion tabata extraordinario, pero e ta insisti cu Parlamento mester investiga y saca conclusionnan.
Sinembargo, criticonan ta bisa cu AVP ta usa e informe selectivamente pa crea confucion y desvia atencion di otro tema politico serio.
Golpi politico riba lomba di e pueblo
E mas grave di tur es cu e discurso aki por crea miedo innecesario den comunidad. Hendenan cu a ricibi FASE no a haci nada malo, nan a solamente aplica pa yudansa durante un crisis global.
Si AVP ta sugeri indirectamente cu esaki mester wordo debolbi, esey ta un posicion peligroso y abusivo.
E realidad ta simpel:
FASE tabata un decision di emergencia. Parlamento despues a legalisa e proceso. Pueblo a depende di e yudansa pa sobrevivi
E berdadero pregunta
Enbes di trata di pone culpa riba lomba di ciudadano, AVP mester contesta un pregunta cla:
Nan ta dispuesto pa bisa e mama cu a perde su trabou durante COVID cu e mester paga bek e yudansa cu a mantene su famia na bida, pasobra e momento ey no tabatin un ley?
Pueblo di Aruba no ta bobo. Nan ta mira claramente con e mesun partidonan cu nunca a tuma accion na 2022, awor ta “spierta” pa critica decisionnan cu a salba miles di bida.
Na final di dia, esaki no ta solamente un debate tecnico riba finansas, e ta un cuestion di humanidad, responsabilidad y honestidad politico.
Y si AVP kier realmente lucha pa transparencia, nan mester cuminsa cu un posicion cla:
Proteha e pueblo, of castiga nan pa a sobrevivi covid-19?
