E firmamento di un acuerdo nobo entre e gobierno nobo di AVP y Schiphol Group pa maneho di Aeropuerto Reina Beatrix, ta un decision cu ta lanta hopi pregunta y ta trece dolor pa hopi hende cu a spera un rumbo diferente pa nos pais.
Gobierno antetior a traha duro pa duna mas poder, preparacion y trabao digno na nos mes yiunan di tera na aeropuerto. A yega e tempo pa nos por keda cu e maneho y pa nos hobennan por mira un futuro cla den un sector tan importante manera aviacion.
Pero cu e acuerdo nobo aki, bo por wak claramente cu nos a dal un paso atras. Schiphol Group no solamente ta haña control riba e operacion di aeropuerto, pero tambe lo por nombra un director di exterior, un decision cu ta pone duda riba e capasidad y e confiansa den nos mes hendenan. E director aki lo haña un excepcion pa por cobra un salario mucho mas halto cu loke normalmente ta permiti, mientras cu e Arubiano lo no haya e previlegio aki.
Ademas di esaki, Schiphol no ta contento cu solamente maneho: nan a logra y tambe un stoel den e Raad van Bestuur di aeropuerto. Kico ta keda pa Aruba? Mientras cu un empresa di for di nos isla ta haya ganashi, poder di decision, y salario astronomico, nos pueblo mester “par wak” con nan ta ranca nos ganashi hiba pa nan.
E acuerdo nobo no ta solamente un decision tecnico; e ta un refleho di e tipo di futuro cu nos kier. Un futuro den man di companianan grandi di Hulanda, of un futuro cu ta trese preparacion, liderasgo y progreso pa nos mes hendenan? Laga nos wak e momento aki pa loke e realmente ta: un momento di refleccion, un señal cu nos mester keda wak dilanti y sigui lucha pa un Aruba cu ta berdaderamente di nos.
Solo di Pueblo ta sigui wak e desaroyo aki serca.
