Diaranson mainta, corte a dicta sentencia den e caso cu Dowers, AVP y Mike Eman a entama contra Electorale raad, reclamando un reconteo di voto, buscando 53 voto adicional, pa asina trece un cambio den resultado di eleccion.
Huez a trata e caso y a trese su consideracionnan dilanti y a bari for di mesa e peticion haci pa Partido AVP.
Huez no a bay di acuerdo cu e ponencianan treci dilanti, unda Dowers ta alega, cu riba un carchi di voto, un persona e kleur e cara di Mike Eman, y e voto a wordo declara nulo. Segun huez cu e no ta comparti e opinion di Dowers, pasobra ora di kleur e cara di Eman na cora, esaki ta bay contra di ley y e voto mester wordo declara nulo.
Pues e storianan treci dilanti, cu a declara votonan nulo, inhustamente, a wordo rechasa pa huez, y huez a bisa cu e votonan ey cu Dowers a trece dilanti, mester wordo declara nulo.
Asina tambe huez a dicta sentencia, y a dicta contra Avp y Dowers unda nan a perde e caso. Nan a wordo sentencia tambe pa paga e gastonan di Gobierno, pero dor cu ta dos ambtenaar a representa gobierno, a declara e gasto na nihil.
Cu esaki tambe e storia di reconteo ta pasa pa historia y e buskeda di 53 voto di AVP pa asina purba na cambia resultado di eleccion ta keda pa pasado.
AVP ta keda cu su 7 asiento, MEP cu 9, Raiz cu 2, Mas 2, A21, 1.
