Cu ki cara ?????
ORANJESTAD – Den un capitulo nobo, presidente di Cft, Sra. Lidewijde Ongering, a sali cu critica contra e solucion cu Gabinete Wever-Croes a realisa pa lanta un compania nobo pa procesa awa sushi di Bubaliplas y di Zeewijk. Pero e cuestion ta: cu ki cara? Pakico e mesun Cft a blokia e solucion den 2022 ?
** Schrap 16 miyon, sino KB;
Na 2022, Aruba tabata cla pa duna prioridad na un upgrade urgente di e planta na Bubali. Gobierno tabata dispuesto pa invirti un total di 60 miyon florin, y den presupuesto nacional ya a aloca 16 miyon pa inicia e proceso. Pero tabata Cft mes cu a menasa cu aanwijzing y si Aruba no schrap e suma ey. E consecuencia? Gobierno no tabatin otro opcion sino pa saca e 16 miyon for di e presupuesto.
Solucion a wordo blokia dor di CFF mes:
Ta den e contexto ey cu CFT a forsa gobierno pa tuma un decision structural: privatisa e planta, y entrega e responsabilidad na un entidad autonomo, cual a bira AWSS NV, un empresa estatal manera WEB, ELMAR, AAA, SETAR y ANSA. AWSS, riba base di un modelo di corporate governance, por busca su propio financiamiento sin impacta e presupuesto di Aruba.
Informacion cu Solo di Pueblo a haya ta bisa cu AWSS NV no a presta ningun cen ainda. Un prestamo ta necesario si pa realisa tanto un upgrade como construccion di un planta completamente nobo, un proyecto cu su total inversion ta yega casi 200 miyon florin. Un inversion urgente y necesario pa procesa awa sushi.
E costo financiero ta manehabel, y AWSS NV mes ta responsabel, no gobierno. Cft ta referi cu e prestamo ta “peperduur”, pero si e no ta cay riba e finansas publico, kico ta e problema ?
Si Ongering ta critica e costo di e prestamo, ki solucion e tin?
Sra. Ongering, den su papel como presidente di Cft, ta lansando duda y critica riba un solucion cu tabata urgente y necesario despues cu Cft a blokia tur otro salida na 2022. Tur paso pa yega na e compania estatal AWSS NV a pasa via Parlamento ( 24 mei 2024!) y a wordo trata cu transparencia y wordo aproba.
E minister encarga e tempo ey tabata ex-minister Ursell Arends. Si un investigacion ta necesario lo bira cu: Geoffrey ta investiga Ursell?
Con un organo cu mes a blokia solucion na 2022, por sali awe lansando critica riba e unico opcion cu a keda habri?
Of Lidewijde Ongering a egt kere cu Gobierno di MEP lo sinta man cruca y lo a habri sluis numa di Bubali Plas, y manda awa lama ?
E dicho ta fit aki: Damn if you do, damn if you don’t !?
