MEP ta un partido cu a traha incansablemente pa libertad, bienestar y felicidad di henter e pueblo Arubano
Awe partido MEP ta celebra su 52 aña di existencia. 52 aña di lucha y sacrificio, 52 aña na defensa di e pueblo Arubano, pero tambe 52 aña di logronan historico pa pais Aruba.
Tabata riba un diamars 9 di februari 1971 cu nos lider inmortal Betico Croes a funda e prestigioso partido Movimiento Electoral di Pueblo (MEP). Desde principio caba partido MEP a pone su dilanti e ideologia social democrata, nos structura estatal y union di henter e pueblo Arubano, sin distincion di rasa, color, religion, districto, status social etc.
E prome directiva di MEP
E decisionnan tuma riba dia 9 di februari 1971 a ser ratifica durante e promer Congreso di MEP cu a tuma lugar dia 14 di februari 1971 den teatro Rialto na Playa.
E promer directiva di MEP tabata consisti di lider y presidente Betico Croes y e miembronan Efraim de Kort, Daniel Leo, Jossy Croes, Sixto Feliciano, Watty Vos y Cezare Terzano.
E personanan presente di parti di UNA tabata Frans Figaroa, Dodo Figaroa, Poy Werleman y Tommy Leest.
MEP ta wordo considera como un partido prestigioso. Un partido cu desde su fundacion a keda un partido grandi y esaki durante 52 aña largo, ya cu MEP despues di su promer salida cu 7 asiento nunca a yega di baha bao di 7 asiento. Den henter Reino Hulandes no tin un partido politico cu un trayectorio asina impresionante!
Crecemento grandioso di MEP
MEP ta un partido cu desde su fundacion te cu awor apenas a conoce tres lider, esta Betico Croes dfm, sr. Nelson Oduber y nos actual lider sra. Evelyn Wever-Croes. MEP ta un partido di cual despues di morto di Betico Croes na 1986 a wordo bisa na Hulanda “Betico dood, MEP dood”. Sinembargo MEP a sigui crece den un forma grandioso, estableciendo recordnan impresionante durante varios eleccion. Pa yega na un trayectorio impresionante asina ta evidente cu e partido mester a haci hopi cos bon pa e comunidad aki. Y esey MEP a haci den un forma cu no ta laga duda atras. Durante e ultimo 52 añanan MEP a traha incansablemente pa e desaroyo di Aruba, tanto riba tereno estatal, economico, social, cultural, deportivo etc. MEP como un partido cu ideologia social democrata semper a tene na bista cu e ser humano y specialmente esnan di menos recurso mester ta central den e desaroyo aki.
Un lucha tenaz
Despues di su promer salida exitoso na 1971 Betico Croes, otro miembronan di partido y e militancia a pasa den temponan masha duro mes na unda nan mester a hiba un lucha tenaz contra esnan cu semper a pone trampanan den caminda pa nos no logra nos libertad, esta nos Status Aparte. Pa por a yega asina leu Betico Croes mester a haci hopi sacrificio, drama sanger, sodor y lagrima pa realisa e anhelo di nos pueblo pa su libertad.
Hecho ta cu MEP ta e partido cu a percura pa nos simbolonan di union y libertad, esta Himno y Bandera, nos moneda, nos ortografia, nos propio Constitucion, Gobierno, Parlamento, nos propio Gobernador, Banco Central etc.
Den henter e lucha pa Status Aparte a resalta e Referendum consultativo dia 25 maart 1977 y e accionnan di Augustus Scur (1977), ya cu tabata danki na e accionnan aki cu Aruba a wordo scucha door di Hulanda. Finalmente e deseo di Aruba a wordo concretisa durante e Conferencia di Mesa Rondo na 1983 na unda nos derecho di autodeterminacion a ser reconoci y aproba pa nos sali for di Antiyas dia 1 di januari 1986 y cu nos lo bira independiente dia 1 di januari 1996 den un Man Comunidad cu Hulanda. Y 13 di juli 1990 ex-Minister President Nelson Oduber a percura pa scrap e fecha di Independencia 1996 for di den Statuut, pero manteniendo e derecho pa bira independiente dia cu e pueblo aki den un referendum dicidi esaki den su mayoria cu aprobacion di 2/3 parti di Parlamento, cual ta un garantia solido y responsabel.
Riba e dia di awe MEP ta desea di gradici un y tur cu a funda e partido, Conseho, Directiva di partido, lidernan di bario, presidentenan, Forza Femenino Grace, HOT, votadornan y un y tur cu a sostene MEP durante 52 aña largo. Na esnan cu a aparece riba lista y cu a bay laga nos, un palabra di gratitud y aprecio pa tur locual nan a haci pa MEP y cu nos Creador duna nan sosiego eterno. Den union y positivismo MEP lo sigui marcha padilanti.
