Awe mainta e homber K. mester presenta den Corte pa tratamento di e caso penal cu Ministerio Publico a cuminsa contra dje. K. tabata e chofer di ex Promer Minister Evelyn Croes.
SOLO DI PUEBLO por a compronde cu e acusacionnan contra K. ta serio. Un acusacion ta di abuso di un mucha. E otro acusacion ta di posecion di hopi arma di candela.
SOSPECHO DI ABUSO DI MUCHA
Un di e acusacionnan cu Fiscal lo presenta contra K. ta cu el a abusa di un mucha bou di 16 aña.
CANTIDAD DI ARMA
E otro acusacion di Fiscal lo presenta ta cu entre 2015 y Mei 2023, K. tabatin 6 arma di candela.
SCUCHA TESTIGONAN
Na Juni 2025, Hues a tuma decision riba e peticionnan di abogado mr. Rosenstand, pa cu investigacionnan cu e ta desea pa sosode promer cu tratamento di e caso. Hues a bisa cu e ta rechaza e peticion di e abogado pa laga K. liber.
Riba e peticion pa scucha 6 testigo, Hues a dicidi cu lo scucha 4 testigo, 3 dama y 1 homber. Hues a bisa cu lo manda e caso pa Hues Comisario, kende lo scucha e testigonan.
Riba e peticion pa duna bek e 6 armanan na e organizacion di practica di tiro, Hues a rechaza esaki. Hues a bisa cu lo mester warda resultado di e caso penal.
Na Juni 2025, a keda palabra cu mayan mainta, 19 September 2025, tratamento di e caso ta tuma lugar.
